初三

今日10點幾就醒左。鬼咩~ 隔離『果條友』同人傾電話傾到4點都未訓！半夜我俾佢d恐怖的笑聲嘈醒左，發覺佢又未關電腦，話左佢先再訓返。

起身一陣妹妹就出街，我一個人係屋企icq同睇vcd。到咁上下就出去姑姐度食飯，係地鐵撞到我4個表弟都去緊姑姐度，就一起走啦。男仔真係幾難相處，我見佢地4個，野都唔講句就由铡魚涌到柴灣。只係仲細的果兩個會講o下野。

年初二

今日唔洗拜年，係屋企訓到下午兩點先起身，再黎vcd。睇左成日，覺得都幾悶。點知係我想玩nds的時候忽然發現，我唔見左盒mario kart的game，同埋一支用黎touch screen的筆。係屋企搵黎搵去都搵唔到，一邊諗究竟係邊度同幾時唔見，一邊訓著左。都係諗唔到幾時唔見。新年流流就唔見野，唉~

大年初一

今日一早起身就要去婆婆度拜年，出到去原來我地係最早果批。跟住d姨媽係咁黎，就要幫手煎糕呀同埋幫手食。我地帶左我整的角仔同埋媽咪炸的腰果，表妹就帶左d自製蘿蔔糕，好快新年就會變左我地一show手藝的地方了。試左一隻椰汁蘆薈年糕，幾好食，不過都唔係好like 年糕的質地，食得多好似好滯咁。

到佢地開枱，我地三表姐妹就落去唱k，同往年一樣。之後再有表姐同表哥join我地，唱到5點幾就同埋媽咪一起返屋企了。

Yvonne + Ivan

今日去到沙田就見到佢兩個呢~

Mr. Steak cafe + 霍元甲 + 『師奶』

今日老豆生日，訓到2點幾先起身換衫去沙田。5點半就去左mr. steak house度食晚餐，d野都幾貴，叫set係抵過散叫的。我地一人叫個set，都食左$600呀！個environment幾好，我地坐sofa，有燭光tim。d野食就係細碟嫁啦，不過都ok啦，我都係鍾意佢送的果d蒜蓉麵包。

之後我地去左機舖打機，去玩左用刀果個，老豆又玩左一次，原本想去玩槍果個，but 好多人等，最後同妹妹玩左次mario賽車就走去睇戲了。

講起睇戲就把幾火，都幾多人一起睇，一開場唔夠一陣，有個師奶係後面話『個細路幾得意！』、『你睇d水幾清？』、『跌落去跌落去』，我頂唔順望去後面一野，之後再話佢『睇戲唔好講野得唔得呀~』，點知佢駁返我『又唔係同你講。』。嘩！心裡面媽媽聲，佢講野又不停、又大聲，你細聲講，間唔中講都由得你呀！之後又講『哎呀！佢死了佢死了』、『佢扶起佢了』、『死唔死得呀拿？』、『毒死了，唉呀佢死了。』真係火鬼滾，我咁斯文都忍唔住出晒粗口咁係個心度罵。一播完，另一pair個女仔就大聲咁話『果兩條師奶有冇攪錯呀！成場不停咁講，由開場講到收場，都痴孖筋的。』我妹同我都不禁附和咁罵出聲。呢！呢d咪就係冇品law，人地講明睇戲係no speaking，唔俾講野嫁ma，common sense, right?! 仲要不停的大聲講。霍元甲個阿爹娘都話，人同人之間要互相尊重，條師奶根本都唔尊重佢自己，佢老公又頂得佢順嫁喎！如果我係同佢一起睇戲的朋友，我真係搵個地洞匿埋啦！醜死人！

呀！(大聲的叫......) 真係氣憤難平呀！！！

56k？！

夜晚返到屋企如常上網，點知上唔到喎！以為係個netvigator舊野short左，點知熄左再開返都唔係。只好打上去hotline度問，打左好耐先有人聽，整左一陣，佢話我press果個可能係56k唔係寬頻，我即刻呆左。我用左netvigator年幾每月俾二百幾蚊，你唔係而家先話我知我一直用緊的唔係6M寬頻而係56k o下話？！而且我冇modem係度嫁喎！而且我成日bt都百幾k都有嫁喎！最後都上到網，but 真係好耐人尋味。如果我真係俾左寬頻錢，but用左56k年幾都唔發覺，我諗我真係要hum頭埋牆死左佢了。

撐死我啦！

今日公司都冇咩野，放工返屋企同屋企人食飯。我地去左屋企附近新開的果間福井日本野度食，７點半去到，點知要等位！我地屋企果頭好少食野要等位的，結果等左差唔多半個鐘先入座。我叫左．．．

• 火炙芝士三文魚壽司
• 白玉豚壽司
• 雜錦魚生沙律壽司
• 火炙槍魷魚壽司
• ｘｘ炸蝦壽司
• 劍魚腩壽司
• 瀨尿蝦壽司
• 雜錦刺身拼盤
• 地獄炒飯
• 玉子豆腐菠菜
• 菜肉芝士餃子
• 京蔥一口牛肉

大概係咁啦。由於長期ｌｕｎｃｈ都係食餅乾，有好野食梗係忍唔住口，結果大部份的野都係我食的。你估呢度要幾錢埋單？！嘿嘿！係$240咋！原來佢計漏左個雜錦刺身拼盤$138 呢！我同妹妹ｃｈｅｃｋ完單等佢碌卡果時我先意識到！不過係因為佢新開張，ｄ野都好亂。地方唔係大ｂｕｔ有成７個waiter/waitress係度做樓面，壽司果度有3個師傅，仲有兩個經理，仲有一個女仔企係門口叫位。真係好誇張。佢都送錯左兩次俾我地，另外又漏左單，我叫d waiter幫我check o下，佢地就只係識話好，又唔見佢地做，到第三次果個先話真係漏左單！所以我最後都有同個經理投訴law。

大學團年

今日放工補足3個字俾佢，補埋聽日果d嫁啦我！跟住同大學同學去左海港城的盧山雪園飯店度食。表哥話唔錯的，不過我就擔心貴啦。你知啦~ 唔係個個都好似我咁食野捨得嫁ma。去到睇左一陣menu，最後都係食左個set ，圍返都成$250 一個人的！我唔理啦！今次係carrie話去食的，我之前提議果d佢又聽都唔聽，隨得佢law~ 上次我同佢地係新世紀食果間唔知咩上海野，食左百幾蚊佢地都不停話貴，ya ya聲啦~ 今次仲一個dup咁。

我係citysuper搵到果隻幾好食的朱古力呢！買左原味同橙味，唉咁就冇左舊幾水，仲未出糧tim嫁~

一時一樣

今日放工早少少走，想話坐早一班車去到食d野。早5分鐘，走之前同阿supervisor講聲，點知佢叫我第日補返d時間。我心諗，5分鐘咋喎，都要補！上個學期返學佢話過15分鐘先要補的，5-10分鐘就由得佢，今日咁講個心真係打左個突。你冇野o下話，平時我留多半個鐘你有冇補返俾我？朝早返工早到我有冇同你計？不過算啦，補返5分鐘俾你law，好巴閉咩！打卡呀笨！

另外supervisor d習性又黎了，上次又係佢自己講要做呢個function，我再三都問過佢了，今日又走黎同我講話都係唔要了。我反問返佢，之前係佢自己話要，佢阿head話要，大家傾完同意嫁ma，做咩有一個professor黎問就要改？個system百幾個user，每人講一樣我都要改的話咪改死我？！不過當然又係由得佢啦，我收左錢，佢要我做就做，唔做就唔做嫁啦，都費事同佢拗。

「寄養」之爭執

今日姑姐d朋友提到佢地有做寄養之家，收政府4千幾幫手照顧d無父母/父母冇能力照顧果d細路仔。政府會有人審查你的入息、家庭狀況同佢的為人，以確定其家庭係咪適合d細路仔居住。最basic的要求係個屋企要有張床俾細路，梳化床係不可接受的。走的時候同我屋企個師奶就拗起上黎，佢話可以呃個審查員，打個比如話我兩姐妹訓一張床，另一張俾個細路仔訓，就可以等到呢個工作，每月earn返4千幾。實際上可以開張尼龍床係廳俾其中一個訓。真係覺得有冇攪錯！

老實講搵錢有好多方法，洗唔洗用寄養小孩呢樣野黎搵錢？而且收得果4千幾，你以為淨賺嫁？伙食水電交通，呢4千幾都係用返係個細路身上的，政府唔會開高價俾你的。寄養的目的係想搵一d有能力，有愛心去幫助果d細路的人，為佢地提供一個溫暖/正常成長的家庭。整個目的唔係為搵錢的，而且利用呢樣野都搵唔得幾多。試想o下呃個細路返黎，淨賺的又唔係多，放張尼龍床俾個細路訓的話，我覺得有d虐待之嫌，訓保良局d床位都起碼有床「肉」。唔係一晚半晚喎！係一個星期5-6日都訓尼龍床喎！如果叫自己的仔女訓尼龍床仲衰，有咩可能為果淨賺唔幾百至千幾蚊，就要推自己的仔女去晚晚訓張唔舒服的床？！人地都話梳化床都唔接受，更何況係尼龍床！？咁你唔好整間籠屋佢訓！？真係冇陰功！

好唔鍾意呢d明明係為左救助弱小而設的福利被看作係賺錢的途徑。當然，你食咩佢食咩，唔會話你食鮑魚時佢食白粥，又唔會虐打佢。不過佢應得的一個床位係好基本的，唔能夠有一個舒適的睡眠，不就等同於每晚都受折磨？！虐待唔一定係肉體上的，精神上的都係。就好似政府外判清潔俾d公司，d公司剝削d清潔工人工一樣。d清潔工都會抗議啦！又好似菲傭都未必有自己的床位，可以都要同d少主share一張床，but 呢d係佢地知道並同意個合約而協訂的，試問寄養的小孩又可唔可以自己有選擇權？

我覺得如果屋企冇地方冇能力冇心的，就唔好去參加照顧寄養d細路。參加得的，就應該給予佢起碼最基本的野。抱住賺錢的心態又怎能給予細路仔溫暖成長的家庭？而且又賺得唔多。要賺的點解唔去幫d人私家托兒！？

當然唔係話我姑姐d朋友咁樣做，只係我屋企個貪錢師奶話咁樣做好正常，大把人咁樣做，話我唔接受現實。我就覺得，做人都係憑良心o者~ 現實或者真的好多人咁樣做，but並唔代表係arm的，冇理由現實係錯的，我都要認同嫁ma。要賺錢，麻煩搵個正正當當，唔會傷害人的方法，用自己的勞力/實力，咁樣去賺d錢，用都用得唔安落。我都唔知d人點諗野的。

整角仔

尋日係屋企想溫書，睇左一陣就冇心機睇落去，因為真係好悶。最後都休息左睇卡通片。

今日一早起身去姑姐屋企整角仔，點知開工冇耐，就黎左姑姐的朋友同佢地的女，共4個人。佢地黎玩o下o既，點知得兩個姑姐搓粉我地六個人等摺。咁當然唔得啦，做到天光咩！同埋大家好多時間都用左係等待度。我只好幫手整粉，最後整完上午我手已經『魚』左了。下午又黎左個表舅母同佢個女，一張table都放唔晒咁多人啦！所以我理所當然的休息打nds。最後象徵式拎返些少製成品就走了。

休息之日

放工去左修眉，俾d 人tum我買佢地d facial，我話諗o下先啦。我本身咁懶，都好幾個月冇fu mask了。跟住同屋企人去左德興叫餸食飯，都ok唔錯喎！不過碗飯真係好大碗，同阿媽share先食得晒。返屋企就繼續睇日劇Power of love，又睇得一集就要訓，時間真係唔好洗。

lost in blue仲未可以捉到d小動物呀！點算呀~

supervisor放完假返工，d同事就即刻有不滿出現了。都係d分工的問題，12個同事得5個開會就自己決定晒d野，用lucky draw黎分工，梗係唔work啦！萬一有個同事唔好彩，次次都抽中咪好唔抵？！不過又係冇我份開會啦，只係開完會佢地返黎聽佢地係度呻o者。

去男友屋企注意事項

今日返工時忽然醒起原來尋日係我係度返工的一周年啦！(拍手~ 歡呼~) 過多兩年就完contract了。不過好想快d有份人工高福利好的工..-.-..我知我貪心o既。我又想過去讀oracle或者d security的cert，我諗security果邊可能會幾好景o既...

坐小巴返工時，arm arm有兩個闊太係後面，佢地討論開d仔女，聽到d野大家如果去男友屋企訓/住都應該要注意的，唔係就有機會俾人話你冇家教。

1. 去到男友屋企，千其唔好鬼鬼祟祟咁匿係男友後面，細細聲咁叫伯友同世伯。我地就因為怕醜同驚，但係闊太話咁樣好小家。
2. 如果要係男友屋企食飯，記得記得唔好等人地阿媽叫你先黎食飯，同埋食完飯要搶住洗婉執野。如果要留宿的話，切記沖完涼d底衫褲要自己洗返。唔好以為自己過門都係客就坐定唔洗做，唔好大模師樣以為人地阿媽會好似幫你男友洗衫咁幫你洗埋，闊太話呢d叫冇家教。
3. 夜晚訓覺如果有怪習慣如要開住燈/收音機訓的，請自備耳筒或注意聲浪。因為人地屋企冇呢個習慣，會嘈住人地訓覺。闊太俾d仔的女友嘈醒，兩點呆到六點先訓到。
4. 平時夜鬼一族的去到人地屋企要早訓，唔好凌晨仲開大個電視又或者十點幾先拉男友去買野打宵夜邊爐。闊太覺得咁樣食無定時，帶壞埋佢個仔。
5. 如果男友阿媽講野粗聲粗氣咁話你男友﹕「衰仔，又唔食飯！」你千其唔好懶幫住男友咁同男友講佢阿媽成日話你地。因為男友實會為你挺身而出同佢阿媽反映，而佢阿媽一向都係咁同個仔講野的，並唔見得係罵佢。闊太覺得好委屈。
6. 仲有寄人籬下，即使人地話「當自己屋企得啦」，都要注意禮貌，千其唔好真的當係自己屋企，呢樣唔arm又話果樣唔舒服又出聲。始終間屋係人地阿媽的，人地係主你係客，闊太話有咩不滿你地扯，搬出去住！

雖則我好想再繼續向闊太取經黎益o下大家姊妹，之但係車到左我返工的地方，我都只好落車了。

食飯

放工去左旺角同carrie, gary, sherman食飯。不過carrie真係一d都冇變，都唔理人地想唔想聽就一味講自己返工忙d咩同點辛苦的事。一開始講教改、講三三四、講英國政府點衰，我一邊呆呆o下咁扮聽佢講野，一邊見到sherman好似好冇引同唔開心定唔舒服咁，真係都想叫佢唔好講呢d。好似羅范椒芬果單咁，猛講佢ied d老師話羅太係好人，對教育好有熱誠，之不過而家d老師咁激動完全係因為羅太講錯說話喎！我都知係佢一不小心講野野，but佢坐得呢個位，就要具備有說話的技巧，佢的而且確係講錯野篤到人law。當然我都唔同意佢罷免佢果d，不過以佢工作表現黎評論返佢的政治手腕/面對公眾的說話技巧，完全係冇咩關係law。

食飯果時佢又講返佢以前做野果間學校果個懷疑非禮學生的老師，上個星期六無罪釋放了。我當然唔出聲啦，因為我知佢又會講個社工唔arm，同埋點背叛學校了，我唔同意所以都無謂講d咩。不過當sherman都提出疑問時，我都忍唔住又帶起個討論。不過carrie都係唔同意，意料之內，carrie一向都係主觀的人，佢站係老師同學校果邊就梗係覺得個社工唔arm，不過佢自己都講個社工手則上可能係arm，but人情上唔arm。攪笑！人地做野o者~ 一定要俾人情你嫁咩~

另外，提到我個friend仲欠robin阿roy錢，呢件事我都知，我都認同係應該要俾左先的，佢之後點改係佢的事。不過由於果個係我個friend，一開始我就已經講定唔洗俾面我，你地自己deal，我唔想夾係中間，所以我唔會出聲幫手的，免得傷害我同個friend的感情。再者出去接野做時都有拖數嫁啦，你估個個都係一手交錢一手交貨咩~ 公司客都照拖你呀你都咪話。不過我都有打個電話去問一聲，佢話月底喎~ 到時睇o下點啦。

我d friend的公司 http://www.gearplus.com.hk ，有需要可以幫襯o下。(賣一賣廣告先~)

遲到+好悶

今日係公司上上o下網就死左，上極都上唔到，好驚係因為佢知我偷懶睇其他網頁而block左我。不過原來係某新同事的機有毒，整死左個network呢！下午好勤力咁邊做野邊睇漫畫，咁光明正大的偷懶係得而家嫁啦！星期四supervisor就返黎了。

放工印埋d notes先去上堂，點知佢個file勁大，印左半個鐘，等車又半個鐘。去到都遲到左又好肚餓，最後買左餅乾就上去。聽到我真係好悶同好冇心機，個miss 講野的樣子(特別係個口)好誇張，講個有字個咀都要wear向下的成個梯形咁。唔望佢只聽佢講野，but佢好似覺得自己講d野好勁咁，但係我地d同學都死晒喎！原來係問題學生好多野問的，大家都靜晒冇反應。data mining講data selection就講足一堂，只係超級唔掂檔！

lunch時kitty黎港大同我整d野，我只係食左幾塊餅，晚頭上堂又係幾塊餅，返屋企就食返個麵先至訓law。

餓死人+harry plotter

好不容易先約到人去睇harry plotter。放工之後就去尖沙咀華樊度買飛，再去十大書坊度睇漫畫，其間諗住夜晚食飯所以只係食左串魚蛋。跟住兩點幾睇到6點幾，打俾人約邊度等，自己去買左d薯片入場食。黎到已經7:20p.m. 了，套戲開7:50p.m.。得返半個hr先入去食飯，本來我係好想食乾抄牛河的，不過怕佢抄得耐又食唔切，結果都係飲左杯朱古力就算。睇住人地食瀨粉，但係其他野我真係唔想食呢...。如果人地早d出黎就好啦~不過人地都好勁，又估到我係邊度消磨成個下午。唔通我真的係咁悶咁易俾人估到我做d咩？！

5百幾個座位得十幾個觀眾，有一家大細當正係私家影院咁d細路係咁講野，另外有咁多空位就硬係有個人要座係我地後面果行，仲要成日整到我地椅背。雖則係咁，不過好有包場feel。harry plotter我覺得都ok，主要都係圍繞個比賽同埋佛迪魔的再生。不過呀張秋，我以為佢會出好多場，又話係plotter的女友，點知都係得幾個shot有佢咋喎！

死刑論

唔記得左提果個netfriend，真係超級煩。我同佢講我唔like佢，佢仲要話黎香港叫我帶佢周圍行。上次講完歧視，我已經好唔同意佢，因為佢話人地都係咁歧視我地，我地中國人要團結歧視返人地。咁即係報復啦，即係人打你，你還手，就開戰啦。

今次講死刑，佢話佢認同死刑，因為

1. 兇手剝奪左人地的生命，理應俾人剝奪佢的生命。一命填一命，天經地義。
2. 死者的家屬失去至親，佢地係想要兇手死。
3. 你永遠不能肯定兇手100%唔會再殺人。

我就覺得真係好恐怖呢d人。而家呢個文明年代仲有人要一命填一命，呢個係一個報復同補償的心態。但係兇手死左，又代表d咩？只係一個人死左，個死者家屬係咪就覺得開心，係咪就覺得可以祭死者之靈，係咪咁樣佢就可以當冇事發生，覺得值？！100%唔會ma。家屬想要的係公義，法庭講左邊個arm邊個錯，懲罰係咪需要嚴重到要拎走佢的生命？！

講個兇手有機會再殺人所以而家殺左佢就唔會再有一個受害者呢個仲好笑。試問你係咪100%sure你身邊的人，未犯過罪的人唔會犯罪唔會殺人？你sure唔到係咪就要殺晒佢地？！有咩証據話一個殺人犯一殺左人就永世都會殺人？

佢根本就係果隻人，以牙還牙，仲有最搞笑就係，仲行緊死刑的國家遠比行死刑的國家多。佢居然話中國人口最多都係行死刑，所以majority係佢度。我真係服得佢好緊要，而家講majority係計幾多個行政立法的政府，而唔係計佢地有幾多個人口。再者十幾億的中國人都同意死刑嗎？由其係中國大陸的法律係佢地話係就係，人民冇否決同討論投票的權利，憑什麼說有十幾億人支持死刑？！同我講阿洛舒華新力加而家係加州的州長都同意死刑，咁又點？之前已經話黎明、劉德華對人陸人好，所以我要對佢地好。而家又想講阿洛同意所以呢樣野係arm o既？事情的對錯唔會因為多幾個知名人士覺得對就會更加對的。咁樣講野真係好無知。

當場殺左個兇手，不論佢有冇後悔都好，對事情唔會有咩改變，死者死左，死者家屬傷心，再要加埋兇手家屬都傷心。不過監禁甚至終身監禁就唔同，佢失去的係幾十年甚至一生的自由。你可以話生命比自由更可貴嗎？有幾多人因為失去自由而選擇死？係監獄內佢地唔係白用我地納粹人的錢的，為左令佢地對社會有貢獻，佢地係需要做一d路牌或者公共設施。我地的法律係為左公義，亦都係為導人向善而設的。當見到d囚犯後悔自己做的錯事，當見入獄時十幾二十歲，出獄時五十幾六十歲，真的覺得好唏噓。誰可以說佢冇為佢的罪行付出代價？誰又可以說佢冇為自己的行為負責？人生大好年華花係獄中，縱使有機會重投社會，既有案底亦冇任何好技能，生活絕對係艱苦的。曾看過節目訪問一個殺人兇手出獄之後的日子，個兇手係獄中覺悟，信主，出獄後積極的去幫人。被佢殺死的人的家屬同佢亦做左好朋友，家屬受訪時話，雖然我的親人死左，不過佢死了的事實無法改變，而從呢件事上能夠去救到呢個兇手重歸正途而且幫到其他人，佢覺得就好似自己死去的親人幫左人一樣。我很認同佢的想法。既係不可改變的事實，即使殺左兇手既唔能夠補償我的傷痛，佢的死只為一洩心頭之恨。咁根本係冇意義的。

好痛呀......

今日放工就急急腳的去沙田，約左朋友去打bowling。不過因為我下午只係食左餅乾，放工時已經好肚餓，如果去打左bowling先我怕我會體力不支 -.-"，所以都係去食飯先呢。有人不停的係度傾電話同hehehe，我就choose左去阿拉麵館度食。之前同某人係度食過一次，都年幾前lu，都唔錯o既。我叫左鎮江餚肉、雞絲粉皮、三鮮拉麵、小籠湯飽同埋紅豆香蕉窩餅。當中我覺得鎮江餚肉好食！其他都係一般，麵就唔欣賞啦，因為我都係為填飽肚子先叫麵呢~

食完野都夜了，冇去打保齡，去左打街機。我玩返上次玩果個武士刀action game，拎住假劍斬呀斬，斬完隻手已經累了。之後見人地打果隻新的射擊game好似幾好玩咁，都有玩到，不過冇人地咁叻，好快就同朋友雙雙陣亡。不過我真係唔知我幾時俾d怪殺左我兩條命呢....我仲以為自己百發百中 -.-" 之後玩左料理大師同埋mario kart。明明玩nds果時我拎第一嫁ma，玩街機就死得好慘，不過開始時佢會同你影相呢！都好多人等呢部機。

呀...真係唔好意思呢mandy...hehe 次次都係我食得野多同埋唱得歌多，搞到好似食埋你果份tim！=p
隻右手玩完d game之後開始痛了，如果有人同我按摩，就好了。>_<

「學校無殺校危機，但面對教改殺我的危機」

頭先睇報紙，講緊呀羅范椒芬話教改同老師自殺無關，d老師好憤怒。陳老師話佢同佢先生都做教師，日日都好忙，佢可以教好人地個仔，但係卻無法教好自己個仔。佢個仔試過自殺仲入埋精神病院。另一個陳老師教體育but冇時間做運動，結果病左。佢話「學校無殺校危機，但面對教改殺我的危機。」原本我都好愁咁覺得真係幾慘o既d老師，不過一睇呢句我禁不住笑左出黎。佢咁樣講......算唔算係好坎普呢？

坎普Camp

今日又睇左一陣書，當中的篇幅好大部份講電影、講坎普。由於係中文書，睇到我真係一頭冒水，咩叫做坎普？作者引用左好多人的說法，話係「輕浮的對待嚴肅的事，嚴肅的對待輕浮的事」。真係完全唔明。到佢講左廿幾段解釋之後，我終於見到坎普的英文了，原來就係『camp』，周潤發所講的『camp camp地』就係坎普......的其中一個意思。

睇到呢度，有種『o我~ 原來係camp camp地。』，之但係，都係唔知佢係咩。-.-"

王家卫的坎普

「我這一代香港人」

今日返工都係一般，放飯前同阿head講返而家整緊咩，將會整埋d 咩先upgrade個system。下午佢就leave左去睇醫生，我自然就嘆啦！自己做自己野，改完左d野就停晒手lu。中午同manfred食飯，佢去左宿舍住，得閒又做o下gym咁，生活都不知幾優哉悠哉。

放工返去中大借我book左的書，叫做「我這一代香港人」，係陳冠中先生寫的。之前係書店見到書名就好好奇，身為香港人的我，好想知佢究竟會講d咩。借左就邊返屋企邊睇，前面講香港而家的情況，係佢地果代做成的果。好似政府每年限額售地係令地價同樓價高企的原因等，又因為佢果代嬰兒潮的人，因為歷史背景、機遇等，養成了考試只求合格、返工只為賺錢、成日心想要賺快錢的心態。係佢地教導下出黎的我地，真的係咁樣呀！=p 睇左頭幾十版，等埋mummy送完機返黎同埋老豆一起食飯。去左大家樂食果個芝士火煱。

之前睇newsgroup都聽到話唔好食嫁啦，不過不到黃河心不死咁，點都要自己試o下先得o既。d芝士汁係撈埋粟米汁，唔怪得d人話好似忌廉湯咁o既味啦！而且汁好少，食d肉同菜再黎麵包，咁d天使麵就唔夠汁點了。因為都幾『漏』，食左d就冇食，望住老豆阿媽果隻一哥火煱船，真係有d後悔做咩唔聽網友意見，試左d咁o既野。唉...算啦，食少d當減肥啦。

開學了

今日返工都係有野做，因為改緊個search function，唔改的話個database會成日扯到盡，個system會好慢。改完之後就要改其他野，同埋同一個netfriend罵交。先黎討論香港人歧視大陸人的問題，跟住佢仲好搞笑咁問「你鍾唔鍾意黎明？」「唔鍾意」「因為佢係大陸人？」嘩！真係b一聲。我鍾唔鍾意黎明又會關佢係咪大陸人的事，咁係咪即係係大陸人我都要鍾意咁先叫做唔歧視佢地？！佢又問我鍾唔鍾意姚明，我同佢又唔熟，點談得上鍾唔鍾意？而且佢打藍球好，我覺得有一部份係因為佢生得高，加埋努力同機遇先有今日的成就，算唔上咩鍾唔鍾意。個netfriend又話我因為佢係大陸人所以唔鍾意佢。佢鍾意姚明，因為姚明係中國人。-.-"

美國人對美國人好過對其他人，日本人都係對自己人好過對其他人，點解中國人唔會對自己人好過其他人！？佢咁問我。佢話我地要喜歡中國，因為我地係中國人﹔我地要喜歡中國人，都因為我地係中國人。不過老實講，我冇討厭中國人呀~ 我只係談唔上係喜歡吧！再者唔通美國人歧視我地，我地又要團結歧視返佢地？咁人地做得唔arm唔代表我都要跟佢地一樣做返同樣的野黎報復嫁o者...

真係好難溝通。

夜晚係master開學了。第一堂上data mining，好悶呀~ 拎返上學期的功課，人地拎98我拎91，人地拎80我拎67。唉~ 聽講成績出左，放學拿拿臨返屋企check啦。一科B一科B+，談唔上開心，不過叫做安心，起碼個retake quota 仲有係度。其他同學話考得唔好，睇怕佢地都係坐A-望A，又或者坐B+望A-咁啦~

想要起碼B畢業都真係唔係一件易事。

電腦展+shopping+karaoke

11點幾出門口，去左深水埗果度食完車仔麵就睇電腦展。本身都冇想過要買野，所以都係走馬看花咁睇o下。都好多人呀！我見到我dream phone果度賣$5980呢~

之後去旺角教協度行o下，我拎左張會員卡都冇上過去，上去買左d曲奇餅呀朱古力咁，未行街都已經一大袋野了。之後去左旺角中心同新之城行，好多人，買左一件衫同埋一件外套，仲有睇中左個龍貓圍裙冇買到，因為唔會常用，而且都唔捨得整烏糟啦！

5點半到去左創興果間neway度唱k。好多新歌都唔識，好在我之前有聽janice同埋王宛之咋！不過mandy入到去就唔舒服，頭痛呢~ 我只好由得佢係度訓，盡我能力獻給佢我美妙的歌星啦~！呵呵呵呵！

『愛情餐歌』

今日訓到1點半先起身，繼續睇果套韓劇『愛情餐歌』。真係好悶呢...呢套劇，既冇靚人，劇情又過得慢。最煩就係果個女人，一唔開心就只係識得罵、打人、同埋扮野。我都好快咁跳黎睇，不過四十幾集都快唔到幾多。今日終於睇晒，之後幫妹妹download返『鋼之錬金術士』，因為harddisk已經冇晒位，只好快d睇左d卡通片先。睇左果隻叫唔知咩野，而家睇緊果個叫Trinity Blood，講吸血鬼的卡通片。

仲有今日有打lost in blue，好難打呀，唔洗幾日主角就餓死左。點解人地可以玩到十幾日嫁？！

愛情戲

今日mummy同親戚去大陸旅行，夜晚自己買野食。一邊睇vcd一邊偷睇妹妹果本陳慧的『愛情戲』。好快咁睇完，完左我都唔覺話特別好睇。作者不過係將故事中每個角色都有一章講自己的事，合埋就會知其實發生緊d咩事同埋d關係係點o既。不過當中有一個話個主角忽然想起以前某一個男友，想起男友同佢講的故事，不痛不癢，但係耐不耐就會想起，咁樣就發現原來自己果時愛過呢個男人。真的係咁嫁咩？咁就係愛過呢個人啦？

唔知道呢...

What is your true color?

Brown

You're brown, a credible, stable color that's reminiscent of fine wood, rich leather, and wistful melancholy. Most likely, you're a logical, practical person ruled more by your head than your heart. With your inquisitive mind and insatiable curiosity, you're probably a great problem solver. And you always gather all of the facts before coming to a timely, informed decision. Easily intrigued, you're constantly finding new ways to challenge your mind, whether it's by reading the newspaper, playing a trivia game, or composing a piece of music. Brown is an impartial, neutral color, which means you tend to see the difference between fact and opinion easily and are open to many points of view. Trustworthy and steady, you really are a brown at heart.

如果‧愛

今日下午趁套戲落畫前睇左啦！都唔錯呢...不過池x熙真的係一個大配角，金城武同張學友都好鍾意呢！我覺得周迅有d似趙薇。都有喊呢...張學友出走返黎做跳落黎果幕，真係以為佢想以自己的死變成孫納的回憶，點知原來張學友係唔死o既..-.-"。不過最後三個人都係分開就有d唔係咁開心。

bbq

尋晚11點就好眼訓訓到今朝11點。約左大學同學3點去bbq，去呢度呢~ 原本我滿心期待想話玩o下射箭、釣魚或者踩單車嫁！點知...入到去4點就話開始燒野食了，一燒就到8點幾。5點幾6點我就飽晒了，睇住電視乾坐幾個鐘。大家又好似冇咩話題傾咁，好靜呢......打排球又好似有人唔arm玩。不過yvonne都真係好勁，真的食足4個hour都仲食緊，唔知佢點keep fit的。8點幾佢地好似話去玩大富翁(賭錢)or打牌，我都冇咩興趣，因為我都坐到好眼訓同悶，想快d返屋企訓呢。

唉~ 邊度先可以搵到一班志同道合的朋友呢？！除左都市的生活如唱k，食飯，打機呢d之外，都會喜歡去o下郊外，打o下波，玩o下d平時唔會玩的野的朋友仔。你地去晒邊呀！？