星馬旅行(六)

吉隆坡 -> 新加坡

一早起身check out，坐內陸機去新加坡啦！唔知點解個個過晒關，阿妹就過唔到。原來係個電腦有問題，CHECK唔到，搞到好耐先過到。一過左關，就聽到廣播搵我地！原來final call啦！真係嚇鬼死我地！

到左新加圾，當然係先去我地住果間hangout的平價hostel度落腳先啦。果度其實都唔係好遠，地鐵站行15分鐘到啦！不過要上樓梯，但係附近都係一D靚樓，仲有個公園仔。呢間hostel真係一般啦！最唔好的係個廁所。放低D野，我地先去附近有名的Muthu's curry度食咖哩。天氣熱到死，食完就出發去搵阿濤濤介紹的黎記海南雞飯。今日真係一日都係搵野食呀！海南雞飯OK啦，油雞切雞都食左，都係咁上下。過埋對面試發源地似骨茶。由於食左飯，所以只係叫左一個肉骨茶大家試下就算。點知個伙記態度十分的差，好似入黎唔叫小菜就唔得咁。仲要我見到佢同另一D伙記講我地只叫一碗肉骨茶！真係無名火三丈起，肉骨茶又唔係好好味，一味都係胡椒多、拿喉，食完就拿拿聲走，仲要俾返D濕紙巾佢，費事佢收我地錢。

食完坐的士去night safari，先係去個threater度搵位坐，因為7點半就有動物SHOW睇。點知7點鐘果度都坐滿左人啦！好在我地搵到位坐，等到佢開SHOW，點知4種動物有3種都好唔聽話！叫隻豹仔過黎主持人身邊，點知隻豹仔就係咁聞D草都唔理人。跟住有隻動物話識得分類垃圾，頭果幾次真係將D膠樽放入回收膠樽的筒，但後黎拎鋁罐同其他野，佢都係放係果個筒度！唉~ 失望！可能呢度對D動物太好，都唔訓練佢的。真係海洋公園D表演都仲好睇D呀！

睇完SHOW出黎就坐TRAM去睇動物園。其實都一般好睇，因為黎黎去去都係鹿最多同最近。因為太黑，所以阿媽佢都睇唔到幾多動物。而且佢仲係TRAM度恰眼訓！佢話有D風，就想訓！激死！睇完動物園，ARM ARM好時間睇埋噴火表演，行埋D商店就返hostel訓覺lu。

星馬旅行(五)

吉隆坡

起身拎埋D行李去左melia hotel度寄放行李。途中去左個茶餐廳度食早餐，叫左個roti canas，即係淨薄餅。之後見人地食一個好大的，我地又想試下，只好有指指黎叫。點知果枱的女人過黎同我講，原來佢係華僑仲講廣東話，教我講果個叫做Toosai，下次我識得叫啦！呵呵~

放低晒行李，之後就去行街。先去個mall度行下，見到人地BLOG提到必買的vincci！唔睇由自可，一睇的真係好平喎！阿妹成日彈我個太陽眼鏡唔好睇 (係ANS買嫁！成2百蚊添嫁！)，我係果度買左副，都係HKD$80。之後又睇鞋呀、耳環啦！我買左一對耳環。LUNCH去左出名係馬來野的MISS KWAN，都幾多人等位呀！食落都OK啦，又唔係真係好好好好味。食完就去搵超市買手信，搵到舊街場咖啡粉。係果度遇到一對台灣夫婦，佢地話呢除左呢個咖啡粉，仲有個香餅係有名的手信！所以我地拿拿聲又走去搵個香餅店買買買！

買完去影雙子塔，點知發現......下午個太陽係正個塔果度，根本就影唔到相。我阿媽佢咩都唔CARE，最CARE就係影到靚相！即時黑晒口面啦！我地由東行到西搵黎搵去，終於搵到一個地方影到成個塔。不過我地差D要訓晒係地下！烈日當空，汗流頰背，都冇塗防曬。因為太煩啦！拿拿聲影完入商場涼冷氣啦大佬。

影完相又去血拼，留低老豆係KFC自己坐，我地又行左幾間VINCCI，買左幾對鞋呀！全部都唔洗HKD$100一對，好鬼抵！夜晚返去melia hotel，pack埋D戰利品入去行李，我地又好free咁去附近夜市食飯。食左燒魔鬼魚等等，仲有肉骨茶。

跟住又返左tune hotel度訓。

星馬旅行(四)

樂浪島 -> 丁加奴 -> 吉隆坡

上午訓晏D，食埋早餐，就執野準備check out。下午12點坐返2個鐘船出去丁加奴。由於我地係夜晚機返吉隆坡，所以我地係丁加奴周圍行下，有市集呀、有水晶寺廟、都去左唐人街。我地去的係全白的寺廟，包左架的士車我地周圍去。

8點到坐返飛機返吉隆坡，一樣係住Tune Hotel。因為太夜啦！hotel果度仍然係咁多外國人，佢地係樓下嘆下啤酒傾下計，都真係幾寫意。

星馬旅行(三)

樂浪島

6點幾7點就起身，因為要早D去麼麼茶景度影相。因為同行有一群O靚仔O靚妹，成日捕左係個景度玩，搞到人地影唔到相。所以只好一早去，睇怕佢地玩完通宵，都冇咁早起身。果然係冇人呀！狂影之後，就食早餐。

食完野就要急急的去拎埋浮潛野去集合，呢程去marine park度浮潛。我地自己帶左一磅白麵包黎餵魚，想不到人地買左3磅！！！D魚想唔飽都難。我、阿妹同老豆先去餵魚，今次我地又帶左潛水相機影水底相。阿媽自己係岸邊坐下。果度好多魚，阿妹唔想咁快俾佢食晒舊包，咪拎高係水面引佢地，點知D魚餵食到跳出水面食麵包！同埋D魚幾蠢，會咬我地手指以為係麵包呀！

之後我地去左另一邊睇珊瑚。水係幾清，仲有一塊好大好大的珊瑚。眨下眼個幾鐘又要走。返去又係jacuzzi度坐下，又食lunch啦。食完返房冇幾耐，老豆居然訓左gur gur聲，阿妹又話曬，所以大家都留左係房度訓晏覺食芒果。大概4點到，我地打去前台問下酒店前面個沙灘有冇魚仔睇，想話去行下。點知原來係沙灘左邊果度有shark b b 出沒，有D人去左果邊睇啦！我地都去果度睇下碰下運氣。不過果度好多沙石同埋珊瑚，浪又大，大家都好難企得穩。最後當然係睇到啦！我地3個都睇到呀！兩條孖住一起游水的shark b b ，有一隻手臂咁長嫁！

跟住又係食晚飯，聽下歌又訓啦。

星馬旅行(二)

吉隆坡 -> 丁加奴 -> 樂浪島

一早就起身，因為今日坐早機去丁加奴，其實都係馬來西亞的一個地方，果度先有船入去樂浪島呀、停泊島呀咁。尋日問左可以穿拖鞋上飛機，所以今日一家都穿拖鞋，唔洗咁熱都仲要著襪著鞋。其實我本身就知道係可以穿拖鞋上飛機的，不過阿媽就好鬼死驚人地唔俾，驚人地覺得你著得唔市正就唔俾你上飛機，要我地問櫃枱確定先得。

我地去到丁加奴先係9點幾10點，一出去就見到好多的士，原來佢地係要係櫃枱俾左錢，拎住飛先去的士度O既。係機場影下相，又有人有三急，等等下同機D人都走晒。我地見到係停車場有我地訂果間resort的旅遊巴，不過因為我地睇到BLOG話自己坐的士仲平D，所以冇BOOK。但巴士的職員走過黎問我地係咪住果間酒店，又話成車人等我地4個。嚇到我同阿妹幾驚，大家雞同鴨講因為職員D英文有限。後黎搞清楚，原來佢地等緊另一D人，就搵唔到佢地，仲問我地上唔上佢地車，而家俾錢都得。我地冇上呀，返去打算坐的士時，發現個櫃台黑猛猛冇人！唔係下話？的士都有得收工？原來阿姐真係執晒手袋走人，見到我地問我地係咪坐的士，幫我地寫埋張單，仲同我地講佢地係跟飛機班次開工的。果度一日得3班機，所以佢可以走先，之後先返黎都得。

的士坐去碼頭都係MYR$25，但旅遊巴士一個都要MYR$18，所以我地係抵的，仲同一時間到碼頭！係碼頭買船飛，媽咪同阿妹就去附近的市集度行下，我同老豆就留係碼頭坐下。其實老豆都想去行嫁，不過又費事留我一個人係度，但我個背包實在好重，唔想行。佢兩個返黎，買左D生果，有芒果同埋果隻叫紅毛丹。上次係泰國食過紅毛丹，唔係咁好食，不過阿妹想試。同船的人都買左好多。呢程船坐成兩個鐘，都幾暈下。去到見到藍天白雲梗係開心返啦。

間房依我地要求係二樓，不過話要向海，佢又真係向海，但就好鬼遠，仲有椰樹遮住。不過都好近大堂，食飯都行少兩步O既。我地飲左杯welcome drink，拎房時阿媽搵黎搵去都搵唔到到訂房紙，差D要倒晒個袋D野出黎搵。不過都搵到，搞掂手續就上去食LUNCH BUFFET。之後返房同去租浮潛的野。

個島上面好多人，原來今日有麗星郵輪的人上黎玩，所以有攤檔又有歌唱有遊戲玩。抖一陣就去泳池游下水先，雖然成個package係包3次出海浮潛，不過我地冇打算去晒。泳池都係得D本地人，阿妹唔識游水，一去到就去左個jacuzzi度坐按摩下，我就係泳池度游下水。唔知我係咪一睇就好似唔識游水咁，有個本地女人問我識唔識游水，我話識，佢先安心咁走開。=.=" 怪怪的。

下午4-5點，有D人去完浮潛返黎沖一沖又落左泳池。果度寫明係唔可以係泳衣外LUP衫落水。有一群香港O靚妹俾救生員話左都係咁做，扮晒唔識聽英文咁。真係令我好鬼丟臉，大家都香港人，尊重下自己尊重下人啦。

上樓沖個涼抖陣就去食BBQ DINNER，呢餐好呀！有任食串燒！我同老豆講成程旅程食最好係呢餐，好食多D啦。佢笑下當我講笑，哼~ 之後佢就會知道我講的野有幾ARM啦。食完野，樓下間BAR有人唱歌，都係一D老歌，有英文、國語、廣東話，我地坐係附近聽陣歌，老豆就話要返上去訓LU。