除夕夜

一大早上班遲左10分鐘，唔緊要啦！今年的最後一日，大家都唔會介意o既...我諗。今日穿得好普通，一黎天氣實在好凍，靚靚裙太薄唔穿得；二黎本來話去clubbing，結果都唔係去，又冇咩活動，唔洗穿咁靚啦！

成個朝早勁多人問今晚有咩節目，即係大家都冇節目啦！我就應承左冇節目就返屋企同兩老食dinner。本來係有一場任飲的約，不過我一向都唔喜歡狂飲酒，而且又貴，唔想到時呆坐成晚。傾到下午時，kitty同阿全打黎，話不如今晚去k，佢地都唔想去任飲，叫我問埋leo。於是我又問leo，又同author阿全計。結果傾好諗住返屋企同兩老食完飯，夜d再出黎同leo同埋佢d friend倒數，再去唱k。

臨放工jack先叫我對d data，好搞唔搞，係要呢d日子先叫人ot！不過唔緊要，我7點到都搞掂走得。同屋企人去左大家樂打邊爐，返到屋企換返條牛仔輩同波鞋，就出去旺角meet leo。.......

結果呢個倒數，我係係卡拉ok門口，拎住電話咁過的，真係始料不及。

唱k唱到3點幾到我就走了。一黎d人我唔多熟；二黎我點的歌排係隊尾，有排都未有得唱；三黎雖則佢地唱勁歌，氣氛high，但係我唔慣嗌歌傷喉嚨，又唔慣長期係咁嘈的環境度，加上我眼訓，所以都係走先。好幾次我都忍唔住用手摀住耳朵，太嘈會有耳鳴，傷害我的聽覺。不過間唔中一次o者~ 我見阿清high到勁跳舞。不過因為佢地叫酒飲，埋單都要$350一個。我地梗係蝕啦，我只係飲左兩杯fruit punch，leo都係飲左幾杯之ma。算啦！節日係咁。

仲唔比我捉到你！？

前排聽到有個識左冇耐，又冇見過幾次的人，同人講話我霸道，女尊就男卑。

我聽後真係無明火三丈起！真係想黎想去都唔覺得我有做過咩野俾人咁覺得，可能我吹水時係豪爽左d，但我真係冇壓低男友黎抬高自己ma。我問過幾個同我比較熟d的人，佢地都唔覺得霸道。咁件事都由得佢啦，佢又唔熟我，佢點諗我都管不住。

點知今晚返屋企之後上網，佢就主動同我傾msn。次次都係佢主動的同我講野，我從來冇主動同佢講野嫁！證明我唔覺得同佢熟。佢居然講講下就話我同我男友﹕『佢一定錫晒你啦！』『點解呀？』『男卑女尊，冇計啦！』

拿拿拿，d火就係咁上黎啦！咩男卑女尊？就係你呢d小人係度亂up野令到我幾鬼咁唔開心。『乜野男卑女尊呀？』『因為你係三高女士ma』我就估到你嫁啦！唔係第一次話我三高嫁啦！咁即係話因為我三高，條件比較好，所以就男卑女尊，食住我男友。咁同我的表現係冇關嫁喎！咁又關我霸唔霸道咩事先！？

就知道佢係介意女方比男方叻！佢就直認係因為佢大男人，覺得男仔如果唔叻過女仔，就會俾女仔食住，覺得會有尊卑之分。呢d真係好唔要得囉！大男人唔緊要，男仔覺得自己應該要比女仔叻，冇問題，我估冇女仔會介意男仔俾自己叻。男仔叻d，女仔就可以倚靠對方。之但係如果係妒忌、諱忌女方比自己叻，覺得自己會俾人睇低，會俾人食住，咁好明顯就係你自己的問題啦！

自己有問題，就唔好係背後亂up先得嫁！

一係，就追d比你差的女仔；一係，就自己叻d爭氣d；再唔係，就自己自信d。

如果你自覺自己除左條件，冇其他野值得人欣賞，咁我都冇辦法，幫你唔到。

家庭聚會bbq

10點幾同媽咪出門口，去姨媽屋企，因為今日係佢度bbq。我地原來係最早去到，等埋其他姨媽黎就一起bbq。當中梗唔少得說說是非咁，聽下佢地講返d陳年舊事。今次表哥又冇帶佢女友出黎啦！次次我冇去果次佢就帶女友，我去果次佢就唔帶。之但係今次有新野喎！估唔到嘉麗表姐帶左佢男友ray出黎！

之後d姨媽就猛話下次到我啦！要我帶個『friend』出黎見下面。=.="

3點幾4點幾，就同表妹們&妹妹，去左旺角行街買野。行完朗豪坊都買唔到咩，不過我見到好多戒指款呀！表妹同妹妹都話我的想法唔多可行，整出黎會好核突喎.....唉~

再去旺角中心度行左陣，好奇怪今日唔係好多人咋喎！不過表妹買belt果間shop個男sales定老闆，真係好臭串！阿妹問佢d t-shirt貨係邊度返，條友仔話：『d貨係邊度返唔重要，你係鍾意件衫，件衫係意大利返定巴黎返都冇關係。』我地聽完就覺得有d興啦！大佬呀！你方你係旺角中心賣百幾二百蚊件會係咩巴黎靚貨咩！咁怕講自己d貨源？！唔洗問阿貴都知你係大陸返貨啦！不過見表妹仲要係度買belt，就唔鬼串返佢，買條belt就快走。一出店，我講左句『條友仔真臭串！』阿妹同表妹就即刻忍唔住係店外大聲的罵條友仔，唔知佢聽唔聽到啦。

轉戰又一城，表妹買埋個袋，我地就去左稻穗亭。都幾好食o既，海膽唔錯，但係三文魚就一般。

異獸戰2

訓醒下午12點睇，打左陣nds，就沖涼換衫，去荃灣買戲票睇異獸戰2。

今日我試坐一條新路線，就係係屋企樓下坐77k去錦上路西鐵站，再坐一個站到荃灣西。但係唔知人係咪真係老左，坐呢架巴士打住nds，就好快的頭痛，真係怕自己會嘔。去到荃灣西感覺都仲係唔係好舒服，全程都要用上差唔多一個小時，下次都係坐返火車地鐵會比較好。

去到排隊買飛，先醒起我張coupon係ua戲院的，而家間戲院係百老匯的！今次捉蟲啦！冇計啦~ 下次先再去UA度睇囉。買左飛之後去macdonld度食個shake shake薯條，呢個法式蒜香真係唔好味，leo話都係紫菜味最好、跟住就係椒鹽味。好在我之前都食左包紫菜味的，而家紫菜味賣晒啦！

睇完異獸戰2，我冇睇過第1集，覺得一般啦！對於怪獸的打鬥，感覺上比較核突，異形的造型同老媽子喜歡睇的果套一樣，又係口中有口咁。不過以前果套異形就係人同異形的對戰，今次就有異形、殺異形的外星人同埋人類3個方面。

之後我地去左食糖水，食左芒汁腸粉、紫米豆腐花仲有唔記得咩糖水。都ok啦！芒汁腸粉唔係想像中咁好食，許留山的芒汁河粉好食d。送左d禮物俾leo，就走啦。

我諗佢都鍾意掛！=p

d 人呢

Lunch 同呀kitty食。佢係幾個月前一起出過去打桌球同打保齡的女仔，見左一次only。之後佢返左美國繼續讀書，間唔中都有msn 下o既。今次佢返黎，住果間酒店就係我公司隔離，所以佢搵我同佢一起食晏。人地叫到，唔去又唔好呀，所以都係去左。我就最怕同d唔熟的人食飯，要諗野講ma。平時我冇帶飯都好少同其他同事去食，我情願自己食。不過個lunch都食得ok啦。

放工leo太累，所以冇見。咁我都走返去log-on，買左果件奇怪的野作為禮物的一部份。

去cova買到我喜歡食的cake。

夜晚leo打黎提我記得買禮物，怕我過左1月1日就唔會買。哈哈！笑死我啦~ 好在我尋晚就買左o者。不過講真，過左1月1日，我又真係唔會想買返份禮物o既，可能側側膊就算。=p

大出血

放工去又一城度行。行左一陣，終於都係決定買呢樣禮物，行就行d嫁啦~ 不過唔緊要啦！

係log-on見到一d好奇怪的野，睇左好耐，都唔敢買，都係諗下先。

之後又行左agnes. b，見到一個男人問隻戒指，六百幾蚊一set，除左一個圈之外，仲配有個好似guitar pick的樣的裝飾。我覺得都係一般好睇o者~

去cova想買喜歡食的蛋糕，但係賣晒。又去左godiva買左盒朱古力，係同妹妹打賭輸左的禮物。再買埋個芝士蛋糕就返屋企lu。

終於了左件心事，唔洗成日諗買咩禮物好。

換換愛(完)

尋晚睇換換愛喊得太勁，對眼都腫晒。夜晚返到屋企再睇埋淨底果幾集，搞掂。

仲未買返送俾leo的聖誕禮物，聽日放工就去買！

休息日

前兩日都出左街玩，今日就留係屋企休息下。成日係屋企，清下我d劇集。睇完左一套韓劇，就開始左睇『換換愛』。有靚仔的賀軍翔！！

之前帶去旅行睇果本"For one more day"，結果都係返到黎香港先至睇，都睇晒嫁啦！好唔好睇就見人見智。不過我覺得都ok，尤其係提到個作者再次同佢死去的阿媽相處的時間，仲有一大篇講佢媽媽佢對的好，同埋佢對佢媽媽的唔好。果種失去左，又再一次短暫擁有的感情，好鬼催情。

聖誕船河party

聖誕節一睡醒就12點多了，食點東西、看了劇集，就開始化妝了。因為我的形象指導今天節目豐富，只好自己花。4點多貼上假指甲就出門了。

在天星碼頭等埋其他人同leo，一起上船。40人我認識的大概有十個，記得臉的大概有5個。其他的都不認識。今次是virginia搞的活動，大都是她的中學同學、同學的朋友，表妹跟她的朋友，以及我們這些比較熟的uwants友。

上了船，風高浪急，我在甲板上坐了一會，就回到船艙。因為我穿的是黑白色裙子，怎想到發生瑪麗蓬夢露事件！！唉~ 肯好沒事。船到了迪士尼對開的海面，他們在玩介紹自己的名字，而我看著外面又大又紅的月亮，跟船家夫妻討論著那究竟是月亮還是汽球。船家肯定的說那是迪士尼的汽球，還連著線的呢！我可看不到線，可是什麼樣的汽球可以有一pat pat黑點，像月球表面的呢？結果我們證實了那真的是月亮。有幾首船都在等看煙花，當煙花放出來時大家都在嘩嘩的裝興奮。

之後我們吃了美心跟pizza hut的到會，大家都吃得不多，剩了不少的食物。看看風景、吹吹海風、之後交換禮物就完成了活動。禮物就真的不怎麼好了，我抽到的是抹sofa皮的油，leo抽到的是一盒melty kiss跟特別的膠布。另外leo中了大獎，那是一個風筒呢！

回程時船在海旁外駛過，喝了酒有點high的健對岸上的人叫merry christmas，岸上的人又喊回來。很搞笑！十一點上岸，leo就送我回家了。

*************************
今天的妝化得爛極了，還加上那個很醜的髮型，唉~
現在看著相片超想哭的。

平安夜

4點就可以收工，成日都冇mood做野。早上遲到左3個字，睇陣野，12點幾又到lunch。我地team同隔離team約好左一起去食buffet，去左銅鑼灣海景酒店，lunch buffet都算係咁。

我食左魚生、牛肉壽司、天fu羅、咖喱魚蛋同沙律。之後就食pancake同puff等甜品。食左4輪後，食埋生果同雪糕就宣告投降，仲有少少想er 返d氣出黎添！

返到公司3點，爽呀！做左一粒鐘就走得。4點多就走人，到荃灣等leo。6點半leo到左，一起去逛下街，我買左件圍巾聽日party穿呢！跟住就到左早就訂左位的Olive cafe，呢間cafe 裝修幾好，又有candle night。我地選左食x'mas set，而其他人多數都係食x'mas set。野食都幾好，飲品的santa claus 係以椰子同多種生果溝的，味道很好。至於酒就很普通，冇咩酒味。食完飯就周圍逛逛就返屋企lu。因為leo聽日仲要返工呢！

走的時候係天橋遇見捉小販！

呀！收左leo份聖誕禮物，係一個時鐘，可以寫返文字的white board。即場的寫上幾句說話，set左呢一刻的時間，就將電拆除。

呢個時鐘，永遠只停留係呢個一時間，呢一個有我、有你在的時間。
(忽然好肉麻添~)

Shopping

尋日冇咩時間行街，所以今日去返。9點幾落去剪個髮，剪得好難睇，唉~

返屋企睇陣韓劇食d野，等埋阿妹起身，2點就出去朗豪坊度行街。2點行到6點，我都係買唔到野，人又逼，感覺真係好失落。唔係你肯花時間肯花錢肯行，就一定可以買到自己想要的野o既。結果我忍唔住去超市market place買左三文魚壽司，同阿妹行埋一邊食左佢，慰藉一下自己，先至返屋企。

冬至

本想一早起身去剪髮，但係起唔到身。起左身時，又顧住打下nds，睇下韓劇，結果都冇早d出去買衫買禮物。同妹妹好快的行左行沙田，買左之後party交換禮物要用的禮物，我要幫leo買埋呢！就去姑姐屋企食飯。

我買左一個摺成白菜狀的毛毯，用黎係office凍時可以蓋住膝蓋大脾，仲可以防走光。另一份係廁板坐墊，仲有個『爆』字係度。妹妹幫我選的，唔知人地arm唔arm洗。

到左姑姐屋企未食得飯，就同阿妹雙打住nds先。本來7點食飯，結果到8點先食，都幾餓。食完傾陣計，叔叔就車我地返屋企lu。

公司happy hour

工作日日如是，反而今日放工有公司搞的happy hour。我地公司d人一向都唔多團結，公司活動冇咩人參與。呢個happy hour如果唔夠廿幾人係搞唔成的，所以deadline果日個同事不停的tum我同其他同事去黎湊人數。其實都抵嫁！只係俾$5蚊就有酒飲有k唱，仲想點呀？！

放工等埋其他同事7點去北角一間樓上吧度飲野，每人兩支啤酒兩支cocktail。我先叫左杯Nothing，點知勁難飲。其他人叫的cocktail好似都唔多好飲。我飲左兩啖就冇飲，因為我比較肚餓。我地叫左d小食拼盤黎得超慢，黎到仲次次由果邊d同事食先，傅到黎都得返少少，根本就食唔到幾多。反而nuts就係任食的。

點左4首歌唱住先，唱完8點幾9點，就打俾leo睇下今晚見唔見，聽日我放假ma。因為周圍太嘈，我走出左vip房，又出左bar，最後去埋後樓梯。傾完想話返入去拎袋走先，先發現個門係開唔到的！只有係入面先開到，係樓梯度係開唔到門入返間bar度的！好在我手上有的係電話，打俾isabella，叫佢出黎救我。再同其他同事講聲byebye，就去同leo見面，到italian tomato食左個cake同飲杯朱古力，我餓嫁ma~

俾老細check

由於之前『準時』走人去california度問價，今日返工時，有同事同我講返，果日我走左之後，經理行過黎問我去左邊。d同事都話唔知。

=.=" 大佬呀！前幾日我都ot左因為有野趕，今日o少日都得嫁....

再戰California Fitness

舊同學M先生前一陣子join了california fitness，最近他告訴我他的教練問他有沒有人介紹入會，先告訴他我想要的plan，他就叫我見面再談。

6點多就離開公司到雅蘭門口等M先生了。他說了教練跟他說的話，心裡有了譜，說好如果離心目中的budget太遠就要斬釘截鐵的走，別浪費時間。剛進去坐下，那裡的assistant manager就認得我們了，當sales來到我們面前，就可以開門見山了。直接的問他的plan有什麼介紹。問了幾問，他好像不太明白我的說話。他給我的plan比那個assistant manager 給我的還貴，那怎麼可能join？當我告訴他2個月前他的assistant manager給我的plan是什麼，我要的不是一樣的plan，如果我要的是一樣的plan，我那時候就join了，我要的是更便宜的。可他就一直問上次的plan是什麼，硬說要找。找出來又怎樣？那都不是我想要的！

結果他給了一個$280/mth, 2yr contract, all club all time跟 $345/mth, 1yr contract, 1 club all time 作為選擇。$280那個勉強還在我的預算內，可是兩年的contract...。那個sales讓我覺得很煩，我多次要拿袋走了，可是他就是不減價。那也沒關係，我可以等，回家考慮再來我不相信就沒有了這個plan。再說，這個sales 真的不對勁。早就說了我才是他今次要sales的人，M先生早就join了infinity的member，可是他很多時候都望著M先生來說話。結果我邊拿袋起身，邊跟那個sales說﹕『你叫我俾你機會？！好！我給你機會下一次再向我sale個更便宜的plan。』轉個頭跟M先生說，我要走的，你走不走？

可能M先生以為我之前拿袋是要裝樣子，要sales減價。可是我是真的想走了，要談也要跟一個正常一點的sales談吧！出了門口，M先生說我很型，說走就走。我也覺得自己挺型的，以前總是被捉著談2-3個小時，筋疲力盡才能回家。

之後我們到一壽司吃了晚飯。一壽司十點後所有壽司跟飲品半價，我們9點去，都已看見有人在排隊了。

剪髮

本來今晚同leo一起去剪髮，但係公司又要ot。ot到7點幾先走，去到尖沙咀都8點啦，佢都差唔多剪完，所以我打住nds等。下次我都可以自己黎呢間試下。

之後去左係甜品，係甜蜜蜜度食雞翼沙律，因為我其實都幾肚餓。之後行左陣新港中心，係路上遇到robin同阿roy，打個招呼咁啦！

*********************
今日因為男朋友講d野，令我都有d唔開心呢

OT

聽日有個Build要出，今日我試個d test case試到9點幾，累到爆。冇晒mood，本來想返屋企整埋校友網d野，而家咩都整唔到。又等後日啦唯有。

下白泥睇日落

昨晚傾電話到2點幾先訓，今早我又10點幾就起身，因為今日係我搞去下白泥睇日落的，當然要做d準備先去啦。



一上網細姑姐就同我msn，原來係表弟想讀英文班，搵我傾下。傾完就睇要點去下白泥、搵地圖邊度等邊度坐車、教左阿清之後再搵gary睇佢同mickey識唔識去。我仲mark埋的士台，怕唔識路都call到的士ma。



1點幾就坐巴士入元朗，跟leo會合，再去搵埋mickey, gary。點知阿清尋晚bbq玩得太夜，遲左黎。本來打算4點幾入到去，結果4點幾我地先入去。睇網度話唔係總站落車的，但都係唔識落，係總站行段小路入到去海邊，個大陽都得返丁屎咁少。問一問迎面而黎、相信都係睇日落的人，佢地話4點10就開始日落，叫我地快d影幾張相，唔係十幾分鐘就咩都冇得影。我地拿拿臨影啦，一pair pair咁影，又獨照等等。不過近日都係多雲，都唔方睇到好靚的咸蛋黃嫁啦。





















搞掂之後就沿路出返去坐小巴去返元朗，食個B仔涼粉先至走。

mickey同gary今日穿左情侶裝同情侶戒指！勁sweet咁喎！

其實我本來係想同leo兩個人黎浪一浪o既，不過阿清話有興趣，就索性叫埋gary同mickey囉。不過今日一班人去都唔錯，兩對人都係度sweet sweet。係阿清會lonely d，見佢都唔多開心咁。

Shopping alone

11點幾去做facial，去完trip都要補返下嫁ma。

下午出去旺角想買衫買boot買外套。行左圈旺角新世紀，冇咩買到，食個哈根丹士雪糕。又行左半條花園街，食左串魚蛋。冇心機行，轉去旺角中心同新之城。買左對boot，係上面行左一層，唔得啦！太多人，根本行唔到，行到都冇心機睇衫。索性走人去左對面睇漫畫。

6點半leo打黎，約埋一起入深井釣魚灣。阿清係果度搞bbq通宵，我地只係去玩夜晚。去到bbq左陣，原來佢地識左一班新人，係借爐俾佢地識的。其中一個係北京黎做野的，仲係area manager添！勁呀！阿sha幾積極去識人呀！

我食左d野，就俾author叫左去玩數字球。今次我醒呀！同leo講聲，問佢去唔去玩，我先去玩嫁！點知我兩次都輸，俾人扔左兩次龜！11點幾同阿椰子佢地去左食發記甜品，返黎同阿全搞埋生日，我地先走。係附近行左陣就返屋企lu。

***************************
唉~ 今日又有誤會。

又死

尋晚特登放個call機係床頭，今早起身第一件事係check下我有冇miss call，原來冇，心都安落晒。

不過原來都係有事發生，1st caller去左support。我就係公司度睇係咩問題。成日1 SSA, 1SA同埋我就係度搞呢個incident。

夜晚係team gathering打邊爐的日子，7點到我地先搞掂d野去酒樓。成個邊爐打左3個幾鐘，悶到我抽筋。冇計啦，d同事個個都遲黎，我地食完，又要等佢地食埋先走，我又費事早走啦。

結果十點幾十一點先散band。

大大獲

返到公司聽到『bi~』我身上有咩野會發聲嫁？

死囉！原來係公司support個call機！client打黎緊係大獲野。我拎呢個係2nd的機，應該點call都係call 1st 果個先。除非1st果個都miss call....個call仲係凌晨3點嫁添！

公司自己team的同事一個都唔係度，已經十點了，我只好打去問下佢地係邊，會唔會係拋低我去晒support。原來有個屋企有事、有個病左。都有同事去左做support。

返黎俾manager出email話囉...唉~

原來係基仔

尋晚睇舞台劇，未入場等緊leo時，有架van仔係劇院門口停左，有個女人掛住工作人員card出出入入咁，我都估到係有明星黎左嫁啦！今日一睇呀譚偉權網頁，原來係古巨基黎探佢班！vee冇去睇真係後悔啦！

仲有走的時候見到tvb藝員，鬼佬黎o既呢...又做警察、神父，咩都做果個。

喝彩音樂劇

很早我就買左飛去睇呢個喝彩音樂劇。最初係老豆話我知有呢個劇，會唱返陳百強、張國榮的歌。但一家人去睇就要千幾蚊，太貴lu，就冇理到。到而家係第4次公演了，我於是同leo去睇。

譚偉權，我之前就已經睇過佢幾套舞台劇。呢套劇其實都ok，主要都係聽果d歌。大家都好熟悉而且『郎郎』上口。中段講到leslie開concert，譚偉權佢原來要落黎觀眾席同我地握手！！好在我買飛買得前，雖然係側左d。點知我伸左手出去，佢黎到我前面時，有個觀眾你後面扔個狗公仔俾佢，佢接左公仔就冇同我握手走左去。嗚......

坐我隔離的女人好勁，可能佢唔係第一次睇了，佢自備左閃燈捧，中段拎出黎舉！！leslie死果時唱緊『當你見到天上星星，可會想　想起我‥‥‥』忍唔住都喊左幾滴眼淚。走的時候好多人爭拎簽名影相，我冇去排呀！費事啦~

畢業影相

約左大學同學去中大影相，都係去到邊影到邊咁啦。Eric同yvonne擄走左我隻mcdull公仔自己去拍拖！！好心你地就自己得閒再黎談談情啦！眼冤！

意想不到會收到大家送的花，我都係借妹妹個公仔做道具咋~ 冇法啦！男朋友都唔識做...嗚~ =p

畢業禮

真係馬不停蹄。今日就係畢業典禮。我坐的位置都幾前下，俾d人影左好多相，可能又要洗錢買相了。3點幾4點完事，妹妹黎埋就周圍行下影下相。degree時影得太多，而家master畢業都唔係咁有興緻影，而且又多人呢~

5點幾6點影完就返屋企果頭食個tea，之後就出荃灣同leo食飯。

可能係幫我洗麈，去左間泰國野度食，叫到一table都係，又飯又半隻雞同小食。但係leo自己食好少野...肥死我。

校友會會議

一返香港第日就返工，星期五啦，heir下heir下又放工嫁啦！

夜晚又要趕住返屋企果頭，去舊校度開會。因為係我旅行其間，我被選上做校友會的幹事，想唔到我咩人都唔識，都有人投票俾我，仲74票添！返到屋企果頭，8點，原來個會遲左開始，所以趕得切。

開完會10點幾，餓到慌了，索性咩都唔食。坐主席車返屋企，落車時發現跌左個電話係主席車度。結果要佢返黎俾返個電話我，勁唔好意思添。

之後係屋企附近公園聽mandy講尋晚驚喜的拍拖紀念日，傾到12點幾就返屋企訓lu。

澳洲之旅 第十四天

Hornsby -> Airport -> Hong Kong

早上妹妹話要作最後沖刺，去返尋晚去果個商場度行。極速的逛左個round，買左d果仁。11點幾就返屋企執野準備回程。回程前用相機拍video，影姨媽間屋企其他姨媽睇。姨丈就車我地去機場lu。

check-in左機位，我地就係機場度閒逛。因為知道飛機餐唔方arm食(之前食麥片..>_<)，所以係免稅店果度，我地搵左間Bondi Fish & Chips 作係澳洲豪洗的最後一餐。老豆又選埋d唔值價的煎蛋腸仔煙肉，好明顯地佢都係喜歡食返香港食到的野多d。而我就叫左炸魚薯條。4個人食左野，又行多陣就去閘口。想不到會見到架A380！今日姨媽返工就係要扮乘客上A380度做測試！

飛機又delay成粒鐘，我同妹妹就雙打nds渡日。上到機發現呢架機有monitor嫁！終於可以試下係長途機睇戲啦！呢d高科技野，兩老一定係唔識用嫁啦！所以我要走黎走去的幫佢地教佢地選擇。而我自己都睇左3套戲，有五星級大鼠、落水狗(Underdog)、仲有阿森一族！好！賺返佢$180戲飛錢！

返到香港都夜晚11點幾。手機冇乜電，都唔打俾leo啦。係上巴士時竟然收到mandy電話，向我報喜！真係恭喜晒啦！

澳洲之旅 第十三天

New Town

最後一天又係自由行。我地都係去shopping，姨丈先車我地去burwood，之後我地行左陣再去左New Town。冇咩收獲，下午去試左Rebecca話幾好食果間泰國野 Thai Times 9。ok咁啦！閒閒地一食又2百蚊港紙，愈近返香港，就愈肉痛洗錢。

7點幾食完，自己坐火車返Waitara下一個站Hornsby的超級市場作最後沖刺。又係因為我醒，先識轉車咋！呵呵！係hornsby原來都有個大型商場，可惜太夜，收晒。澳洲人5點就放工嫁啦ma。

澳洲之旅 第十二天

藍山 -> 龍蝦大餐



Tina要返工，所以我地又換返7人車，一起去Blue Mountain。係屋企去藍山要差唔多3個鐘車程，訓下醒下咁。一落車就見識到leo提醒我的野啦！烏蠅！郊外真係勁多！



我地先去睇三姊妹峰，當然又係藍天白雲青山綠水咁啦！行左附近一條山路睇下景，就趕去山下睇洞穴。呢度有好多個洞穴睇，本來我地去睇最出名果個，但原來入去條路又斜又彎。姨丈要好小心咁drive，結果去到遲左，睇唔到果個cave。之後選左另一個Imperial Cave，入面有好多水晶睇。如果俾貴d入場費，都可以去睇Imperial Diamond Cave，我相信應該有好多好多鑽石係入面！

2點半由講解員帶我地入去睇，呢個係影得稍黎好d的Crystal City，都真係幾似一座城嫁！

















沿途我充當老豆的翻譯員，因為佢唔識聽英文嫁ma！睇完姨丈又車我地出去食飯，經過九曲十三彎的路，去到高速公路返Waitara時，天色變化得好勁！落大雨仲落『bo』！呢幾晚其實都有落大雨，不過朝早都幾好天的。但係今日真係....落狗屎！由於架七人車係借人的，所以都怕怕地整爛人地車要賠。最後安全到達大華酒家，當然係食龍蝦刺身啦！呵呵~

澳洲之旅 第十一天

Waitara -> Shopping

姨媽一家陪左我地咁多日，我地都應該要獨立下。今日就自己行。一早就出發，係姨媽屋企附近個火車站Waitara買票去Town Hall。果度係市中心，多d街行。因為景我地已經睇左好多，所以自己有時間時，反而想去行下街，睇下有咩特別野買。















呢張相我幾鐘意嫁！

Shopping都冇咩野買到，我地經常去而又買到野的係超市。阿妹鍾意買d香港冇得賣的朱古力返去食。

一整天行黎行去，時有陣雨，最後又去返darling harbour, circular quad。行返之前行過的公園，但呢次俾我見到一個筍野！

注意！此相片兒童不宜！

呢個雕塑放係公園唔起眼的一角，外國人真係開放，呢d雕塑都好難係香港d公園度搵到，所以我影低黎，俾大家學習下。haha

澳洲之旅 第十天

The Rocks Market -> Pancakes on the Rocks -> Bondi Icebergs -> Bondi beach -> 壽司天國

今日行程超級arm我心水！呀！唔記得提姨媽每日都有整早餐我地食，有時食花生醬夾麵包，有時係煮粥，仲有朱古力、腰果等小食。又係8點幾起身，兩家人一起到The rocks market度行。呢度係妹妹期待已久的地方，我地都諗住要係度買d手信嫁啦。由於今日早餐係打算係Pancakes on the Rocks度食，所以先去食左野，有力先有得行嫁ma。




















我地食左3種pancakes，有香蕉果仁、有朱古力、仲有唔知咩啦！總之都好好味，不過pankcake賣到咁貴都真係賺死佢。一碟有2個pancake + 雪糕，都要10蚊澳紙到，如果加pancakes就抵d，加個幾囉。

食完(唔飽嫁我)就上去行market，好多人呀！我地係度買左Rebecca話好味的一大條鳥結糖，返去做手信請同事食。途中見到d細路仔穿尿片係小噴水池度嬉戲，好得意~






























行完姨丈就車我地去Bondi beach。可能因為係星期日，人實在係太多了，姨丈搵車位都搵到一段時間。我地都係係遠d的地方落車再坐巴士去，先去海灘旁的Bondi icebergs度食晏。本來係想去restaurant的，但係爆晒，只好去上面的bar度坐，食d小食。呢度個景真係一流，難怪個沙灘咁出名！一去到我同妹妹都急住去影相lu，叫左d小食頂下肚。呢度又係貴野，當然有咁靚的景唔收貴d果個都唔係老細啦！














之後就去行沙灘。沙灘人好多，好難搵個位坐。我地行下行下，係咁靚的沙灘，咁藍的天空下，人梗係要做返d低B野o既~
















行左陣就搵個位坐下。就係咁樣，我用shishedo的防曬都冇可能抵擋呢個太陽，呀妹就不停向我打眼色叫我走，之但係去到個咁靚的沙灘，如果仲匿埋係把遮入面，會唔會太大晒呢？犧牲少少，在所難免啦！

曬左陣係就黎燶的時候我地去左附近的market度shop。呢個market就真係好market，d野cheap d，我係指貨品唔係價格。有d好似係二手衫添！當我野野想睇太陽眼鏡做下型女的時候，阿妹就彈句﹕『返香港去花園街買啦！』

5點幾就去左間大學度，等我扮係果度畢業，影左幾張相。亦都同Tina的男友Marcus會合。7點Tina book左位去呢間壽司天國度食dinner。因為聽日係佢的生日，我地冇咩準備，又唔知買咩禮物好，所以索性呢餐我地請啦！原來呢間唔係一間好出名的餐廳，只係好多學生都會黎呢度食。呢度的特式係咩？！

冇錯！就係好大舊的魚生！件件都厚dum dum！！正呀！表妹最愛帶子壽司，一件壽司有3粒帶子呀！幾錢件就唔好講，一定比香港貴d，但又唔係離晒譜果隻。總之叫完又叫，食到我飽晒先收手。姨媽姨丈就慘d，佢地唔係好食生野。姨丈叫左個烏冬，仲俾我地取笑添！

食完飯去NewTown度行下食雪糕，咁又一日啦！

澳洲之旅 第九天

Paddington Market -> Max Brenner -> ????

星期六表妹Tina都唔洗返工，姨媽租左架8人車，車左我地去行街。妹妹早就想去行d market買野，今次去左Paddington Market度行。呢度好似女人街咁有好多攤檔，不過當然比女人街乾淨企理啦！有衫、手袋、手飾、食物等各類貨品。本以為黎market應該可以有平野買，但係睇返d價錢，在於係香港生活的我地，點都稱唔上係平囉！所以我地只有食左個waffle做早餐，姨媽買左d新鮮又大粒的士多啤梨黎食下。行完睇完就算。由於12月3日係Tina表妹的生日，Rebecca買左件睡衣俾佢當生日禮物。

之後tina帶我地行下market附近的shops，係一間店度，我同妹妹都睇中左條裙，一睇個價，嘩！7舊幾水，byebye。呢度d女仔都穿得好sexy，勁低胸，我覺得好有女人味。去左附近的朱古力店Max Brenner度食朱古力。我叫左個Italian Thick Chocolate, 妹妹叫左個Soffle。Tina極力推介的Italian Thick Chocolate真係幾好飲，厚厚熱熱的朱古力係一個mug度，用雙手捧住飲一啖，好似係北極度飲緊熱朱古力咁，暖入心。不過咁樣食朱古力都係太溜，我都飲唔晒一杯。































姨丈黎接我地走，就去唔記得左邊度的海邊食Fish & Chips炸魚薯條。出發前妹妹的朋友都早已話，一定要食炸魚薯條，好正嫁！咁我地食過，都真係好食過係香港食，人地d魚新鮮嫁ma。















我地幾表姊妹，係咪都好似差唔多大咁呢？呵呵呵~

食完行下呢度，餵下海鷗。又開車去到邊睇到邊。夜間就去左間Italian Restaurant度食dinner。果度個環境good呀！好home feel，我仲懶醒開枝紅酒飲下！因為我見唔係好貴。10蚊澳紙1枝，老闆娘自製的紅酒。不過...太勁啦！我飲左一杯到就冇飲，最後剩左半枝紅酒呢！仲有又係自製的tiramisu，樣就一pat pat，食落其實都ok，但好大酒味。不過正統的tiramisu係有酒味o既~