課程

今日成日都睇網頁，搵到一d好得意的課程呢~

• Six Sigma 管理系統 - 免費講座 (申請左......想去聽o下咩黎呢)
• 外遊領隊證書課程
• 職前導遊培訓課程
• 人力資源管理入門 (好抵呀！)
• 室內設計入門 (好抵呀！)
• 室內設計 (一)
• 音樂課程：聲樂技巧訓練課程
• 戲劇課程：表演技巧基礎訓練及選段排演課C班
• Golf

『我』的存在

今日係google同yahoo等多個search engine search我個名，原來都好多人同我同名，仲要係好勁的。一個得左個行政長官頒的獎，一個就唔知咩運動勁的。

好在都仲有真係關於我的網頁......咪就係心誠的學生報law...唉....

http://fls.hkcampus.net/~fls-0026/companions/online/magazine_p21.htm

http://fls.hkcampus.net/~fls-0026/companions/online/magazine_p20.htm

http://fls.hkcampus.net/~fls-0026/companions/memberlist.htm

喪禮

今日穿了一身的黑白配，為了晚上簡sir的喪禮。放工去到未到約定時間，先去左大圍街邊食魚蛋。等埋d舊同學就坐的士上去，去到原來都好多人，一d都唔冷清。內堂已經一早坐滿，係外面的都係一d熟悉的瞼孔。一班係我以前去教電腦班時教過的學生，佢地都係簡sir的學生，而家大概都中六中七了吧！另一班係細我地兩年的畢業生，我認得因為其中一個同我住同一所大廈的。我地做左要做的手續，坐左一陣，入去見一見簡sir。佢好安詳的訓左係度，由於同d舊同學一起，我唔好意思將說話講出口，只好係心裡講。想同佢講綺薇冇黎，不過佢好有心。想同佢講我會努力去生活，想o下想o下思緒都好亂，眼紅紅的掉了眼淚。過左一陣我地出去，見到張詠敏喊得最勁。再坐多陣我地就走了，係大圍食埋飯先走。

龜之死因

今日搵左一個上午，終於搵到病死果隻龜的死因。 (另一隻係跌死的)

一定要曬太陽(有軟殼病或爛板病)

軟殼 : 此病的龜殼呈暗啞淡綠色, 手按會有軟的感覺, 眼睛無神。

殼龜潰爛: 殼表面長出象霧的黑點,一堆堆好似發毛菌。

白眼病

流星雨

今日早d返工，因為唔想遲到咁多，尋日supervisor的面口好似有d難睇。7:45就同妹妹急急腳的一起出門口，去到火車站，撞到mandy同李sir。原來佢地要出去聽seminar，再問一下簡sir的事，知道mandy的master的事。我同妹妹係旺角落車，妹妹話我肥過mandy好多，唉......

想起簡sir就想起我地一起睇的獅子座流星雨。

今年，我地去睇流星雨，好嗎？

香港大學學生會天文學會

星匯點

失約

原本今日約左人睇戲的，不過從佢的口吻我都知道都係取消的多。結果我都係返屋企，去酒樓買左我愛吃的鮮茄斑塊飯，睇左陣漫畫。

簡sir.....永別

今日下午收到mandy的電話，得知簡sir 佢去左了。mandy佢喊得好犀利，不過我聽到時，同我聽到我媽入左醫院要做手術時一樣，都冇咩反應，只係好突然。傾左幾句，好似係突發性心臟病之類的野，就收左線。我一邊將呢個消息send icq俾中學的舊同學，一邊又sms的send俾冇online的舊同學。

我沒有哭，或者因為我同簡sir並不是成日接觸，對上一次見佢果時都係三年前我剛畢業，去母校教電腦班時。果時佢都好照顧我，我就住係佢果間教職員室，lunch同放學教電腦興趣班，佢都有一起黎睇。佢都有同我一起出去食飯，同我講佢以前做老師同做電腦的選擇，最後我因為搵到電腦工而冇再教，之後就冇再聯絡了。過去幾次中學同學聚會佢都冇黎。

對佢的記憶最深的都係那個似笑非笑的笑容，因為佢笑起上黎個嘴唇係向下彎的，成為左我地之間的話題同笑柄。對佢我算唔上係好尊敬，不過我都覺得佢係個好人，尤其對我係幾關照的。中六七的時候，搵學校interview時，好似都係佢有份in我的。到上堂教physic 佢教得都ok，只不過佢的口吻並不太好。記得有一次班長raymond要負責收$10的唔知係慈善的錢，係小息時候全班都教晒只係欠我未交，當我想交時，簡sir就入黎上堂，我同班長講上完堂交俾佢。誰知簡sir問起仲有邊個未交，班長話係我，佢居然問我：『點呀？唔係冇錢交o下話？』我當時氣極了，心想，我只係尊重你要上堂先延後交費，真的估唔到會換黎呢種恥辱。我重重的將果10蚊放係班長桌上，回到座位就忍唔住哭了。佢上堂見到我哭，不過並沒有說甚麼。那個時候我很情緒化，經常上上o下堂就無故飲泣。

空堂時我最愛跟朋友係學校的大校園同花園邊傾計邊逛逛，由於我唔會咁勤力把握時間做功課同溫書，空閒的時候就係傾計了。記得好幾次同簡sir迎面相遇，佢陰陰笑的問﹕『做咩呀？空堂唔去溫書？做o下功課啦~』類似的說話。我不喜歡別人干預我自己時間的安排，加上要頂頸，就係咁應佢就算。

最記得的就係搞學生報時，我地有好多的不快，面對好多老師的反對之聲，一時就出個問卷調查要俾訓導主任睇過先出得；搞個廣播劇又因為有師生戀的題材而俾好多老師批評。小息，lunch時俾老師叫出去『勸』我地唔好再搞事的事情發生得好多。果一次正上緊pure maths miss tang堂，佢地又將我地叫左出去，承受住咁多重的壓力，心裡有對好多老師古板，小事化大的不滿；再加上應該以學業，上堂為重的我地，居然係上堂時被叫左出去，為住老師不同意我地搞課外活動。我地係禮堂等緊一群老師落黎傾野，不滿的情緒非常高漲，為住同一樣的事一而再再而三的召我地去傾，算是打壓我地嗎？呢個時候簡sir入黎，並沒有佢招牌式的陰陰笑，佢第一句就講：『xxx，今次你又搞乜鬼？』我立時就情緒失控了，不禁哭了而且仲反問返佢：『簡sir，你咁講係咩意思呀？你即係話一直係我係度攪屎棍？......』之後的事我唔記得清楚了，那個會大概都開唔成。

到中七果時我地為AL而煩惱，去左簡sir屋企bbq同埋睇流星雨。其實我都估唔到會去阿sir屋企玩的，果晚我地同師母，同埋佢地的狗一起食野，再係天台度訓低睇流星到凌晨。之後放榜時我的成績一向包全班尾三的，居然全科合格，比起其他同學黎得平均，所以入大學機會幾大。果時簡sir都係笑住的同我講話估唔到我都得。

呢d大概就係佢係我心中的回憶了，雖然笑得陰陰地，說話語氣串串地，不過我都覺得佢係個好人黎o既。對比起文科的班主任，佢對我地確係好多了。今日佢的離去，真的係始料不及，想起往事，想起以後都唔可能返去校園見到佢，唔會有得再去佢屋企bbq，新年冇得同佢拜年，再都唔會遇到個人笑的時候嘴角向下彎了，我都不禁眼濕濕‥‥‥

青衣城

今日又係9點幾鐘醒左，睇左一陣vcd，下午同mummy出左去青衣城行o下，因為佢想去果個懷舊手信街度買懷舊小吃。我地去到食左麥芽堂夾餅，買左陳皮同埋陳皮莓俾老豆，食埋個蝦籽札蹄都冇咩好食了。我見到以前我成日食的零食，好似眼鏡朱古力，一個盒仔有3粒果d果汁味吹波糖，可樂can包裝的可樂味糖，爆炸糖，冰條‥‥‥ 見到有一個櫃的舊物品，我媽咪當然幾興奮的同我遂個講佢以前返工廠帶飯都有用過呢隻飯壺，洗過好多錢去玩抽獎，仲有同兄弟姐妹玩拍公仔紙‥‥‥。睇睇o下竟然見到任天堂紅白機，仲有我以前自己出錢買的gameboy，都係到前幾年先掉的，我真的打左個突！d野我都用過嫁喎！唔係變左懷舊野啦o下話？咁快？原來佢果個係80年代的展品，嚇得我。

行完手信街行左陣青衣城，夠鐘就想坐車去沙田同埋老豆去睇d lcd tv。點知我同媽咪坐錯車去左欣澳站，順便睇o下迪士尼綫同欣澳站係點的。係欣澳站對出有個湖，我媽好大鄉里的話呢個就係迪欣湖，我立即制止左佢，因為個湖周圍既唔新又唔靚，又冇噴水池仲有幾look杉係中間，我印象中以前就見過呢個湖了。因為我大概幾年前都有入過東涌，都見過呢個景。之後我地去左沙田睇左陣lcd tv，去百人一朱食左dinner，再睇多陣就返屋企。

九月十八日 亡

原諒我前晚祈祈o下禱訓著左覺‥‥‥

今日早上訓訓o下見到mummy將隻龜箱放左係窗台吹吹風同晒太陽。9點幾，『o拍！』的一聲將我從睡夢中驚醒，心知不妙，望過去窗口發現唔見左成個箱，我就知到佢跳樓了。正確黎講係被迫跳樓了。我立時叫我媽去睇o下佢點，當然4樓跌落去，當然已經可以想到佢好可能‥‥‥。我媽仲問我如果佢變左一pat野仲拎唔拎上黎。我係窗口望住樓下，見我媽走去花糟拎左d野去垃圾房，看看窗台果隻墊住筧的MD，我不由得喊左出黎。我媽上黎笑笑口，原來隻龜仲識郁，我幫佢沖涼同睇佢有冇反應，再放佢係個dull度先。我媽睇黎好樂觀，不過我就憂心佢只係迴光反照。試問由4樓跌落地對於一隻龜黎講，就算佢的殼幾硬都冇可能冇事。過左一陣我掂佢，佢手腳軟晒冇咩反應，頭都垂低冇晒力，我都心知大概係走了。不過我都打去問一問朋友先，免得佢未死我就誤以為死左。朋友話再等左陣，如果佢手腳硬晒就知了。結果真的係硬晒，我都係用紙巾包好，放左入個大班冰皮月餅紙盒內就放入垃圾筒。

我並沒有責怪我媽，因為唔想同佢罵交，不過心內唔多唔少都怪佢。係一個颱風接近的日子裡，風大到連冷氣都唔洗開，佢點會將個龜箱一半係窗內用MD墊住，一半係窗外半天吊？！風常會將我家的窗簾吸出去咁的，點會想唔到有危險？以往風和日麗的日子我地先會咁樣放係窗口的，咁大個人唔通連呢少少的危險都foresee唔到？

下午媽唔知係咪想等我心情好d叫我同佢去買野。因為尋晚食完飯返黎個房燈燒左，電視機又死埋。所以同媽落左去買燈泡同走個轉，我去左茶餐廳食左個蛋牛麵，走兩走就返屋企了。睇到電話的sms，原本約今日出街的朋友原來返左大陸，結果我返左屋企睇vcd。晚上朋友返左黎，係屋企附近同我食左d野傾左陣計先走。

九月十六日 亡

夜晚同d烏龜換水，發現弱d果一隻，成身都硬晒，無論點郁佢佢都冇反應，位置都係今早見佢的一樣位置。浸住水的腳仍係濕濕軟軟的，但係當我掂佢手腳同頭，佢再都冇反應冇叫了。我相信佢係去左了。雖然佢一直身子都好弱，不過，每晚我掂佢，佢都會叫會郁的。

我用紙巾將佢包住，放了入垃圾筒。唔好想垃圾車將佢送到垃圾場之後佢會被壓成...或者我應該將佢帶去公園埋左佢...如果佢冇被我妹妹買返黎，佢可能唔洗咁早死。

雖然我唔信主耶穌，但係今晚我會為佢祈禱。

考車...成功

今日6點半就起身準備9點20考車。出到去時間剛好，考的路線同上次一樣，都係果條大斜路。當中都差d lai 野嫁。好似我顧住望左望右(扮留意交通)，點知望唔見前面的小巴停左，我即停啦！好在我唔係跟車太貼，我見到考官都差d踩停我嫁啦！同埋車車o下太近對面線了。不過最後都成功左！

之後去左剪髮，再去元氣度邊食邊睇magazine。就返工lu。

運吉

9點就起身同mandy去游早水，點知原來主池搞緊水運會，要係副池度游。

下午去左學車，水準穩定，聽日考試應該唔會有問題o既。完左之後打返俾阿龍，佢3點之後打左4個電話黎，真係想媽叉佢，都講左要學車，仲咩狂打黎！？原來佢搵唔到阿峰。因為我地亂online的組織搞team meeting，約左係屯門等。阿峰係搞手，如果佢唔黎就唔洗搞了。阿峰個電話飛左線去茶餐廳，阿龍就好慌啦。我照坐西鐵入去先。最後都係搵唔到阿峰，我send sms俾佢叫佢快d打俾我。佢就即刻打黎啦，佢話而家先黎，又唔肯講係邊度同幾時黎，我心諗lai野啦~ but我都去到屯門了。

見到阿龍同泉仔，果然冇咩特別的感想。鬼咩~ 一個15歲一個10歲，兩個成身臭汗咁我都唔知同佢地講咩好。再搵阿峰，原來佢冇話佢女友符2知我會去，所以符2就發晒脾氣話阿峰想溝我，阿峰所以飛過去tum返佢law。我真係服得阿符2啦，阿峰先係果19歲，我大佢成5年呀！而且佢中學都唔知畢業未，而家係燒桿工人，加上成日講粗口，我點choose都唔會choose佢啦~ 你估佢好巴閉咩~ 唉...結果阿峰話佢要同426 (今晚請食飯果位)一起7點先黎得，而家先係5點幾，而且我講左唔會同佢地食晚飯的。一黎根本就唔想出，係阿龍死ler；二黎大家年齡差咁遠根本就冇野講；三黎，你方我會貪佢請果餐飯呢個小便宜咩~ 結果我係屯門逗留左15分鐘就坐小巴返屋企啦。留低阿龍同泉仔自己等阿峰，老實講都幾擔心咁細個細路係街度游蕩，聽講泉仔仲係呃佢父母話去朋友生日會先出到黎，仲要下午1點等到而家！即係成4個幾鐘嫁啦！就為左果餐免費飯，而家d小朋友真係好呃。

我返屋企之後就真的休息了，成個星期都馬不停蹄的，真的幾累。我打左機，睇左一兩集vcd先訓。

seminar

今日放工就去左上堂，隔離的女同學先打開話題，傾左陣計。成堂都唔係上堂的，講完又講個course會上d咩，d分會點計，遂個介紹自己，寫埋seating plan之後就可以走了。4點就放左但係我6:30先學車。只好去cd店聽陣歌先。

夜晚學車唔錯。唔知師父係覺得我掂啦，定係行考試路線行到悶，佢居然話可以出其他路面行o下，我地兜...唔知兜左去邊，總之就好塞車，其間死左一次火，but大致上都ok呢~

學車俾人嚇

夜晚去學車等左好耐都見唔到孔師父，打俾佢先知原來佢今日唔得閒搵左張師父代佢。呢個張師父講野一舊舊，唔出聲，唔問佢佢都唔會講轉左定轉右的，所以有d難溝通。不過佢都算係幾好人的，可能因為緊張，成晚都好多錯誤。好似停車唔記得off波都衰左兩次。有次係我唔覺意熄左車頭燈，有個行人係我地車前行完馬路，居然走過黎敲窗，仲罵我做咩唔開燈。我見佢shirt衫的口袋藏有好似walkie-talkie的物體，有條天線伸左出黎，我驚佢係阿sir黎的，都唔知點反應好。師父猛同佢say sorry，個行人罵完，又忽然係度笑。真係好得人驚...乜而家d行人咁衰o既！？

個師父可能對我信心唔大，成日都唔叫我停就自己踩brake，我好似都學唔到野。好在佢只係代一日o者~

IT Trainer 小聚

今晚約左IT Trainer的同事小聚，本來約左係中環，所以我放工就去左香港機鐵站度行o下IFC先。我未黎過IFC嫁~ 原來都好大，不過行左第一層一個圈，全部都係d名牌子貴野，唔係咁arm睇。跟住入左mcdonald度食薯條，冇法啦，又冇咩野做。之後就去左行city super，呢間都係冇之前買果隻好好味的朱古力賣呀！出黎睇左陣fashion show就收到電話轉左去銅鑼灣。 去到又要搵去邊度食，我都話嫁啦，一早book晒table咪好law。 結果我地係搵左間係峰壽司隔離的餐廳食，係貴嫁啦，but我都鍾意食西餐，所以都冇所謂。我最肯花錢係食野上面嫁啦。我食到好飽，傾左大家的近況，之後就轉左去杏花樓度食糖水，差唔多10:30就走啦。返到屋企好夜好累，洗埋龜，check埋email就訓lu。

補課開始

今晚係學車的補課開始，放工就去左銅鑼灣sogo個地庫度行o下睇o下有咩食。見到d壽司好正，不過我同自己講尋晚食得太多野啦，晚晚咁食咁洗，好快就唔掂嫁啦！結果忍左口，但係見到有吉百利的隋圓包裝朱古力，就冇辦法了。呢隻係我細個時daddy年年唔知咩節都會買一盒俾mummy食的。好似之後冇出，超級市場都搵唔到。而家見到就必買啦！仲有蜜瓜味的熊仔餅而家特價，佢係季節限定嫁！你知啦，日本仔興ma。

買完野上左去21樓的宴會廳度，因為IT, b+ab, 5cm等等牌子係果度開倉，低至一折tim。仲未夠鐘學車就上去行o下。好多人，d衫好亂，我見個個都一大袋衫咁拎住，睇過d衫又真係好平，有時$30都有交易了。我睇左一陣差唔多時間就去果度等師父，想買埋個豬扒包，點知人地收左舖。

Master 的第一課

今日放工等左大半個鐘車先去到尖沙咀上堂。去到已經遲左15分鐘，冇晒位只好在係第一行啦。阿sir講緊睇邊本書，之後就講主題啦。今日我地上的堂係Advanced topic on Software System (如果我冇記錯的話) 個focus 係agent上。以前有上過allan wong的distributed computing 都有講過mobile agent，所以唔太陌生。不過呢個阿sir講野幾有趣，佢先同我地講NASA 的space craft例子，再講菲備例子黎解釋同引證。佢問我地What is an agent?呢個亦都係今堂要講的問題。有同學問係寫一個agent出黎時，我地係要寫晒已知的case同埋個agent的reaction入去，定係唔洗寫晒因為好多野都係未知的，而我地的agent要有個ability去面對呢d問題。其實好明顯係要自己寫晒d case啦！agent咪又係我地寫的program，佢冇可能做到一d超乎我地人類做到的野嫁ma。跟住講要有咩條件先可以叫做intelligent agent，睇過晒好多書的definition之後，佢問我地究竟燈掣算唔算係agent? 咁我地打AOE果個電腦呢？

最後當然俾左個滿意的答案俾我地啦。其間佢話我地唔好講hardware的野，因為凡讀computer science的同學仔都知道，我地最怕就係人地叫我地去整機去做technical support，因為我地係唔識hardware的，呢個係我地的秘密。聽的時候大家都猛笑，因為真係好中point，叫我做technical support真係驚到震。

聚集期

今日原本想搵埋朋友黎屋企睇『早熟』vcd o既，不過阿妹唔出街，就唔會想有外人係屋企，所以都係取消左。而之前d打機友約今日去屯門唱k，我初初就應承左去，尋晚我就係個game度同佢地講左話唔去lu，話要幫朋友整電腦。其實係籍口黎嫁o者~ 因為根本都唔arm傾，佢地先得果19, 15, 最細11歲，都唔知見佢地黎做乜。之前話唱k我都覺得唔緊要，我有我唱佢地有佢地溝女。不過愈諗愈覺得我為乜要走入屯門唱k先得嫁？所以都係留左係屋企。11點幾就俾妹妹嘈醒左，起身打機先，梗係唔打d機友打開果隻啦！萬一俾佢見到我，又話去整電腦又上左黎打機咪死？！寧俾人知莫俾人見ma~

打到差唔多3點幾4點就換衫出門口去左婆婆度食飯。果間茶樓真係唔掂檔。食果d餸就好快黎，不過一叫糖水就等半個鐘都未黎。我地叫紅豆沙，楊枝甘露，綠豆沙，芝麻糊湯丸同埋芒果布甸。等半個鐘個部長先黎話冇楊枝甘露，好啦，改左另一樣，又等15分鐘先黎話冇綠豆沙！而其他的糖水一樣都未黎喎！我地就開始鼓譟啦！個waitress話佢乜都唔知，因為係電腦出單嫁喎！聽黎就更加火滾，成間酒樓今晚有咩糖水供應冇理由唔知掛？！冇的就係張點菜單度寫冇或者落單果時就話冇啦~有乜理由要半個鐘有多先可以話俾我地知今晚係冇呢隻糖水賣嫁？半個鐘夠佢係我地table行去廚房來回N次啦！仲好意思賴係電腦問題喎！而且d糖水係一大煲一起煮嫁ma，未開晚市就煮定嫁啦！湯丸我都仲信佢係即叫即整的，冇理由連紅豆沙同埋茫果布甸都咁新鮮出爐掛！？我地果圍不定都大聲的串酒樓d人，隔離table的舅父同表哥就叫我地冷靜。老實講，我地好冷靜嫁啦喎！只係串佢地咋喎！如果唔冷靜我就捉個經理企係度俾我罵夠先啦~

人大左明白左阿媽所講唔好蝕底的道理。以前都會好似舅父咁覺得咁的態度好似好唔應該，有失身份咁。不過而家我就覺得係要出聲嫁喎！唔向佢表達我地的不滿佢仲以為自己冇咩問題tim呀！我地一個月食一次飯嫁ma，可以叫係長期客仔啦！都敢怠慢？！佢地個shop前後轉手好幾次嫁啦！都做唔住好心佢地就做好d啦！細細間酒樓，樓面同廚房都冇溝通o既？呢d咪叫做失敗law~ 唏呀~

又一城

今日一早原本去游水的，不過有d雨就冇去到。訓到11點幾起身打左少少機，2點就同mandy去行又一城。其實係我好耐都冇行過又一城所以先話去的，我想買鞋的，不過又一城唔會有我想買的鞋，所以都幾矛盾的。

我地都冇咩收獲，大家都買左一件衫，我買左個水壺(型仔果d)。行埋log-on同taste就完了，跟住返屋企同屋企人去左蒙地卡羅餐廳度食。carrie又猛話好食好抵，mandy又話呢頭算係幾好的餐廳，雖然佢開張果時我已經食過而且覺得真係好一般，我都再去食多次。野就真係好多，多到食唔晒tim！不過真係唔好食law，我mummy覺得d湯咸，我碟什扒無論係腸仔火腿定係牛扒豬扒都係好咸，我求其食左d就算了。埋單二百幾蚊老實講我點計都話唔抵嫁啦！我二百幾蚊去食pizza hut /其他餐廳食同樣的野都好味過佢啦。我有叫個經理過黎同佢講，叫佢同廚房講o下d野好咸。下次真係唔去啦！我情願同老豆去大家樂好過，起碼平d好食d。

紋身+食飯

今日返工遲左半個鐘呀！好在原來supervisor今日compensation leave，所以都冇咩做野。lunch自己出左去食mcdonald，之後下午就學韓文，記左d字母同埋練習拼返d音出黎。之後就睇左少少書。5點鐘成間房都冇晒人了，其中一個就係放工。另外一個出左去就唔見佢返，睇o下佢個電腦，原來一早就熄左，即係早走左啦！另一個就仲係度，but都有早走，冇果個咁離譜o者~

早走成個鐘，冇王管，走左都唔知佢走左果度勁ma。我呢d新仔都係遲到少少o者，邊有佢地早走咁誇張！

夜晚7點約左bong同sam，先去陪bong紋身。我第一次去呢d地方呀，好簡單的裝修，幾個office的板間左一個位出黎，個師傅係度幫人紋緊腳眼。我地去睇o下有咩logo，睇睇o下我就變左睇電視yummy yummy。因為果d logo真係唔係好arm，好多都係成個背紋的，而且紋小小地一個logo都要$400-$500啦！又會痛，又要俾錢，幾唔抵~ =p 不過點睇都係果d王菲紋果d圖案型仔好多。最後我地睇到9點幾就去左印度餐廳度等埋司徒食飯，佢仲帶多左個女仔黎，係joanna，熟口熟面but我唔識佢啦。後黎走的時候佢同我一起在火車，原來佢住上水，傾傾o下就知原來佢係kenneth的組女...係o'camp時有d過節..-.-" .....不過好在佢唔記得我。

食飯果時，打機果個阿峰同佢女友符2，仲有阿龍打俾我，原來佢地約左我地組織的人10個出黎，想搵埋我。-.- 佢地先得果19, 15歲...真係唔知同佢地傾咩~

總結

見到人地做暑假總結，我又心思思想做，雖然我冇放到暑假，不過9月對我黎講都係一個開始。

完成

1. The Da Vinci Code 全本
2. A Semantic Web Primer ( chapter 1-2)
3. 深圳之旅
4. 考車(不過失敗左)
5. 報左韓文
6. 打golf

將要做的
1. Master course (就開始啦！緊張)
2. 浮潛 (之前想報...不過截左止，要再報！)
3. 學韓文 (報左名)
4. 要睇晒3本教科書
5. 補考車 (許勝不許敗)
6. 學日文 (等學完韓文先~)
7. 讀putonghua 教師證書 (睇o下master應唔應付到，得就黎緊6月報；唔得就完左master先)
8. 搵多份part-time (又要睇o下有冇時間同應唔應付到)
9. 搵個好男人 (呢個好長遠...)
10. 學struts
11. 學騎馬 (興趣班黎o者)
12. 學唱歌 (都係興趣班黎o者)
13. 學樂器 (又係興趣班黎)
14. 學golf (都係興趣班)
15. 學潛水 (...興趣班...)
16. 減肥 (長遠...)
17. 買鞋 (好近期)

Fly me to the moon

尋日行街好似聽到呢首歌，係slow version，好似係日本妹翻唱的，好好聽。

Fly me to the moon

Fly me to the moon
And let me play among the stars
Let me see what spring is like
Oh Jupitar and Mars

In other words hold my hand
In other words darling kiss me

Fill my life with songs
And let me sing forevermore
You are all I hope for
All I workship and adore

In other words please be true
In other words I love you