豬扒包

今日放工去學車，情況一般。學左兩次窄路調頭泊位同行左兩條路線。我覺得比較大問題的係泊位，窄路調頭雖然唔係次次都可以夠快回得晒個軚，不過點唔晒都可以調到頭o既。反而係個泊位到而家都仲係唔係早左就係遲左，再唔係就係幾時點軚都係個師父叫的。真係要practice多d呢個。至於路面，一般都唔係咩大問題，最緊要都係當時考時的路面情況啦~同埋有一段我平時冇得上去practice的大斜路。而家已經俾左錢加多5堂，不過睇黎要再加多5堂先得，即係加左成千蚊嫁啦！不過唔緊要啦，最緊要係pass。

放左之後先至諗食咩，因為都未食午餐。見到好多次d人都會係轉角的舊式麵包店買野食，師傅都係食呢間的，我都走入去買個包試o下先！就炸豬扒包。好唔好食唔識得分，唔難食啦！個包係平時我地食果d麵包，白懞懞的餐包咁o既，都係中庭size，夾住果塊薄的，好似吉列豬扒的豬扒。不過佢唔會咬唔爛，熱熱地幾好食。仲搽左若汁同埋白色的，唔知係咪沙律醬的汁。都唔錯，不過要成10蚊個呢...

下次再去食另一款先~

生日

今晚約左大學同學為7月份生日的聚會，原本約左9個人的，點知有兩個都係因為有野做而唔黎得。有少少唔happy，跟住原本話唱k，就轉去食飯。我係冇所謂啦，反正之前同mandy mario唱左5個鐘。不過carrie之前話佢好耐都冇唱過k的，想唱k，點知robin又話佢都唔係好鐘意唱k。邊樣先arm呀老細？唉算啦！諗住book定位，費事一陣7個人係度等位waste時間，carrie又話去客家好棧直接去拎位。咁好啦，結果我放工去到時係我等位，心想有人唔洗返工都唔會早d出黎等位o既。跟住都等左45分鐘先入得。

之後叫左炸大腸呀，炒米呀咩鵝呀，不過我都唔食呢d o既~ 唔緊要，我唔食唔代表其他人唔食，我叫左豆腐同埋白飯就可以了。之後就各自傾計，robin同sherman傾傾o下傾到喊，真係好意外呢。不過果度的view真係唔錯，如果係食西式野，candle night dinner就perfect啦~ 最後都差唔多11點先走。

收到中大的信，有左timetable了。遲d要搵日返去拎student card，仲要記得reg 科。

忽然發現，我之前話要睇的書，一本都未睇晒..=.=" 唉..

傾計

今日原本係返屋企食飯，不過mario忽然約傾計，冇所謂啦。放工佢黎港大接我，之後我地去左旺角朗豪坊o既star buck度叫左本野飲傾計。我叫左朱古力曲奇Frappicino，同delifrance的差唔多。傾o下我d野佢d野，傾傾o下就夜了，都仲未食飯呢！餓~ 之後返屋企行過買左炸魚蛋同豆腐食。

夜閱發現d烏龜個殼有好多一pat pat的黑色野，唔知咩黎的。有一隻就唔係好郁，點攪佢都係me埋眼縮埋手腳。另一隻就走黎走去。朋友話可能係病左。鬼咩~ 幾日唔換水，又成日唔記得放野食，照顧不週唔病就奇啦。我多手拎左活躍果隻係手度爬，佢不停爬我又搵手接住佢，點知俾佢主人罵，話我會令佢唔願留係個箱度喎~ 咁放返入去之後，佢又真係猛係爬出黎果邊箱果度爬爬爬，妹妹話佢係猛拍個箱呢~ =p 有冇咁誇張呀~

夜晚同人地討論件事，點知人地居然話『咁的人要唔要都罷~』好少事o者，咁都要『唔要人』？！仲以為人地個胸襟好闊tim！雖然我都覺得果個人做得唔係好arm。跟住問多兩問，就俾人話多疑。我完全唔識答，係認真的定係講笑的講我呢？！我多疑？我好多事都放過左嫁啦喎！只係講o下順便問o下o者~ 都叫多疑呢？或者我近排心情唔係咁好，聽咩都好認真啦。不過之後都冇同人地傾計了。

仲係唔開心

今日早上返工前，我又再問mummy，我同佢嘈果件事上，究竟係咪我唔arm。尋日佢猛叫我唔好講就算，我心頂住頂住。我想知究竟叫我唔好講的用意，係覺得我錯左，唔應該再講，定係覺得我arm，之不過唔想再liu起件事。我唔會自己覺得arm就一定係arm的，我一向都會問其他人的睇法，因為我要知道係咪我自己想錯左，係咪我偏激。跟住mummy同我講左陣，我就出門口，話返黎再傾。上左火車一陣，mummy打黎，可能同我一樣都係唔講完就唔順氣的，繼續傾。原本出門口果時都眼濕濕的我，又忍唔住邊講邊喊。都顧唔得周邊的人的目光了，以前我中學果時冇野都係要係火車度喊，覺得咁樣好正常，唔覺得係掉面o既。之後講完我就收聲睇雜誌返工。曾經想過不如sick leave算了，不過人都已經係火車度了，唔好咁衰啦，就照返工。

一邊返工，一邊又係度諗。我對我理想中的另一伴的要求，我覺得的成熟又更清晰了。以前我都會想我男友係又靚仔，又有錢，又有型，又對我好‥‥‥當然一早就知冇咩可能搵到，不過都仲係有一點希望的。而家一樣係想搵到呢隻人，不過，並唔係最重要的。幾年後的而家，發現其實我雖要一個坦誠的人，佢而家對我係咪好好唔係最重要，最重要的係佢同佢家人的關係要好。以前唔好唔緊要，而家好就夠了。細個果時媽咪成日講，要搵好男友就要睇佢同佢家人的關係。我一直都唔明，我搵男友，佢對我好就得啦。佢同佢家人的關係，係佢地的事。反而佢對佢家人好過對我，我咪好慘？！不過而家就明白到，家人係同佢相處最耐最長最多磨擦的人，如果呢個人對佢自己的家人都亂發脾氣，都態度唔好，都唔重視，唔關心唔愛惜。呢個人好極都有限。因為佢唔明白家人對佢的容忍同保護，佢冇體諒的心去感覺去了解那些同佢最親的人的想法。佢對佢家人的態度，將會係佢對你的態度，當你成為佢的家人之後。我能夠接受佢對我唔夠體貼，唔夠細心，對工作同家人都比我好，不過我唔能夠接受佢呃我，唔能夠用心去明白我。成熟大概就係這麼一回事。成熟的人唔係話食飯會大方d定係點，而係有用心去明白人地，去體諒人地，去原諒人地。自自然然你就唔會死牛一邊頸，唔會太執著，唔會成日唔開心。每個人都想搵個伴係見到佢就會開心的。要別人喜歡你的先決條件，往往就係令自己活得開心。d人話愛別人先要愛自己就係這麼一點事。如果你自己都生活得唔開心，你那有能力去感染別人令佢都開心呢？

呢個世代，我地呢d有知識的女仔，想要的野好多都可以自己搵到。錢，地位，權力，不過終究都係想搵一個伴侶一個歸宿。睇newsgroup內的男仔不停的踐踏港女，話我地點高傲，點要求高，點豬扒扮上菜﹔想起老表講d港女點貪錢，點cheap，點臭脾氣，我卻一直堅持我地唔係咁差的。係香港而家的女仔貪錢，係貪有個能俾佢依靠的男人照顧的感覺，係為將來的生活作現實同埋合理的準備。今時今日的男仔，如果仲想渴望搵到舊社會中對男人言計聽從，滿足到你地大男人主意的女人。真係好對唔住，而家的我地有能力，有自己的想法，去供俾自己我地生活上所需。我地並唔係一定要依靠男人供養的。我地高傲，我地諸多選擇，我地豬扒扮上菜，只係為追求我地想要的野。係我地有條件去選擇，我地會選擇最好的。如果冇得選擇，我地自己一個都唔係會死的。如果男仔仲抱住舊有的思想，跟唔上社會的進步，仲希望搵到一個你俾幾舊水就開開心心，你講東就唔會去西的小女人。sorry，可能真係要返大陸果d未接受現代社會女性思想，果d未受教育仲保有以往男尊女卑的想法的女人，先能夠滿足到你地大男人but又冇內在美，又冇能力的人的心態了。

中七聚會

尋晚睇comic睇到凌晨5點，妹妹都睇電視睇到咁上下，我地先訓。12點到就起身，再睇多陣就裝身準備出門口了。今日下午約左中七同學仔打保齡同埋食晚飯。點知，出門口果時同屋企嘈左陣。我真係唔明點解有人可以咁樣諗野的，都咁大個人啦！書又有得你讀，唔係低知識冇sense的人黎嫁！平時又有睇好多書，又學人做『南宮夫人』。點解都係咁諗野嫁？好似每一個人都係有野心，都係有目的的去做某d事黎利用你，傷害你。成隻刺蝟咁，究竟發生過咩事會令一個人變成咁？屋企唔算係好窮，父母又錫佢，除左我同佢都經歷過的唔開心童年之外，並唔算係遇過咩野大的挫折同失敗。呢d係咪就係d學者成日講的，香港的小朋友長期生活係幸福之中，就會養成受唔住壓力的性格同偏激的思想？真係好唔開心。

出左門口同mandy一邊行一邊呻，仲喊左出黎。之後平復返，去左食strawberry forever，食左朱古力扭紋芝士餅+雜果唔知咩，都ok啦。跟住就同clark, ben, coconut, ed, ed 個女朋友kay佢地去左沙田第一城個富豪花園果度打。行左一陣kite同raymond都黎左啦。一邊打一邊傾計，真係好耐冇見coconut同ben，不過佢地都同以前一樣。不過coconut轉左look，我以為佢仲會係中長髮，瘦，面白，仲有鬚根look呢~ =p

之後去左打機，我打左果個劍道game，隻手拎劍拎得好累。跟住係x翠拉麵小籠飽度食飯就返屋企啦。

下次搵日去coconut的網吧幫襯o下先~

牙醫

今日一早就同mummy去銀行整野，食埋四眼仔腸粉，就要佢陪我去牙醫度洗牙。點知係果度好多後生仔女問人係咪買舊書。我心諗，乜...我仲似係中學生咩？！haha...我mummy就話人地以為我黎幫d仔女買書..=.=" 牙醫度等左好幾個鐘，跟住十幾分鐘就完事了。之後就返屋企睇打機同埋睇comics。一睇......就係睇二日了

學車

今晚要學車，不過約左師傅8點。之前同阿head講左會早d走，不過又唔知去邊好。結果5:30我就走左去銅鑼灣，原本係想唔食飯嫁啦，食少餐就算啦~ 不過時間又太多，我去左果間好多人話好食的日本野〈板前〉度，諗住一個人食可能會快d有位，不過都係要等。我147號佢先叫到74號，不過我照等，因為時間太多都唔知做咩好。我又唔太喜歡自己冇錢果時周街行，今個月已經洗左好多同仲有好多野要洗錢啦。我企係間野門口，一邊睇果本深圳自由行的書，一邊聽mp3。打算佢叫到我，有時間的就食，冇就唔食。到7點的時候佢先叫到100號。我都係去左sogo買左外賣壽司，之後又諗去邊度食好呢？呢頭邊樹有得坐低食自己野呢？最後去左大球場對出的一個休憩公園度完成左呢個晚餐。原來公園除左係依泣的地方之外，仲係我的容身之所呢~！^_^

之後學車學得唔錯，係咁多堂內學得最好的。可能係因為學得夜，我又唔係趕頭趕命的，有時間去冷靜同諗要點做。而且車好少，所以可以調頭，泊位，再行路線1，返黎又調頭，泊位，再行路線2‥‥‥最後行埋路線3就整多幾次調頭泊位就完啦~！

下次都可以學8點呢~ 可能表現會更加好呢~ ^_^

English test

今日做左個english test。

你的級別： 進階程度(44/ 60) 具有常見談話主題及與人談話的一般能力。你會使用一般的片語及寫一封信。

TOEIC®(多益)501 - 700
TOEFL®(托福)527 - 602
IELTS較好程度
ALTECompetent user
BEC3
UCLESFCE - First Certificate in English
EF 測驗86% - 90%

Yui meeting

今晚同yui software的舊同事聚會，去左意粉屋度食飯。其間並唔係太多野講，^_^" ，可能有d悶呢~ 不過就食左好多野，叫左兩個pizza，兩個沙律，一個飯，3個麵，共八個人食。夜晚返屋企個肚好似大肚婆咁呢，-.-" ，只好搵手袋遮住‥‥‥

聽到有人plan去越南，之後去泰國，又會去遊船河，真係羨慕呢~

有個MSN Match.com的人add左我，點知原來佢好悶呢。問佢一句答我兩個字「可以」「係」「o我」-.-" 仲話自己活躍。

卡拉ok

記得上次karoke都已係農曆新年同表妹、妹妹唱的了。呢半年都冇唱過，今日就約左mario同埋mandy去唱，叫慶祝mario生日，其實就係順便去練o下歌，呵呵~！我同mandy就不停唱啦，不過mario就好似唔係好唱，唔知係d歌唔arm佢，定係佢唔係咁想唱k，定係佢近排唔係好開心冇心情啦~不過佢都聽左好多電話，好似好多朋友好鬼忙咁。一開始就唱左d新歌，之後就唱d老牌英文歌，到mario走之後我地唱多左陣就走了。埋單都好貴呀！連續唱左兩場成5個鐘呀！不過唔緊要啦...因為好耐都冇唱了。

之後就趕去牛頭角同親戚食飯。mandy借左本深圳之旅的書俾我，我要快d睇左去，plan d行程同埋要訂酒店呢~！呢個係我第一個的自由行，係深圳區做試驗，我諗唔會有咩危險掛？又唔係係羅湖商業城果頭，而且沿住鐵路去玩。不過如果而家有個猛男話跟埋我地一起去保護我地，就perfect啦！hehe~

好激氣呀！

今日放工去causeway bay度學車。開車果時我較好seat位，整好個倒後鏡，撻著架車，踩離合器，準備鬆手掣‥‥‥忽然，師父話﹕『你未扣安全帶喎！』呀！死！俾佢嚇一嚇我隻鬆左，架車就衝前向住個上落緊貨的貨車度！好在我即刻踩返住咋~ 唔係死人嫁啦~

之後去左買野，跟住行返去mtr的時候，我10點鐘方向有一pair男女係度行，摟摟抱抱的時候居然越線，叉隻腳係我的前面。而我已經開步走啦，結果我踼到個女仔的腳，而佢又"cake"到我，不過我冇跌到，就冇理佢照走啦。點知過一陣，忽然有人從右側面踼我隻腳踭，但係左後方有男仔叫左聲好假的"哎呀！"。我回過頭望到果對螢光色的女裝鞋就知道係頭先果一對男女，已經氣得七孔生煙了。佢地分明就係報覆啦！我走係佢前面，佢係正我後面都可以係右側"kick"過黎，個男的仲要裝模作樣的扮晒野！我唔想係街度同佢嘈有失我身份，就咁走左。不過一路都頂住條氣，同mummy講完，同幾個朋友講左都消唔到氣呀！！！鬼唔望佢隻腳爛掉！而家d十幾廿歲的靚仔女，只係識得以仇報仇，以眼還眼，都唔想o下係邊個係當街當巷摟黎摟去行路唔正，"cake"到人都唔講聲sorry，仲要走黎啺返人報仇！變態嫁！！！

我妹妹話應該即時就用充滿粗口的眼神"bear"返佢，兼話佢地『發咩神經呀！』or『要搞野行埋一邊啦！』-.-"，我怕我講左之後會送多巴掌俾佢地呢！

之後坐車返屋企訓覺，做咩都冇晒心情了。

生日禮物

今日返工又係咁過，都冇咩特別。放工約左gary一起去買禮物。之後去食飯，去左果個日本咖哩飯的店返食，好似話新開的。成間店都只係食咖哩飯嫁咋~都幾貴嫁！食得飽你o既~放心~跟住傾左陣計就返屋企lu。聽日要返早ma。

不過一邊返屋企一邊諗......買俾carrie份禮物，我都幾鍾意呢~！如果我買一份俾自己，會唔會...好衰呢？

諸事不順

今日阿head放假，一朝早擺脫開sick leave的慾望，but都遲左少少返工。返到去左睇睇右睇睇，完全進入休息的狀態。lunch先去左銀行，跟住就去左仙跡岩食大餐，lunch time完，打個電話返去話遲d返，我就去左sport centre想整埋我張gym card。身水身汗去到，原來我唔記得帶相做唔到証，要下次去過！激死！又返返去開工。放工又走去sport centre，諗住偷雞入去gym room，反正都冇人咁得閒去check 人地有冇gym card嫁啦~ 換晒衫先發現原來我冇$5入locker！櫃面話冇散紙，走去tuck shop，一大班地盤工係度眼超超，老闆娘猛話冇散紙。結果迫住換返衫出返黎返屋企。都唔知點解港大d人咁唔helpful o既！如果果度有部即影即有的証件相機，如果果度d locker唔洗錢/有散紙change果d機，就冇事啦！就算係poly呀，係舊canteen問人暢錢都唔會唔暢啦~！唉...總之就黑仔啦~

深圳之旅睇黎真係未必搞得成啦~ Mario又可能要返工，咁佢屋企都唔會借俾我地嫁啦~ Mandy個friend又話唔去歡樂谷，返而去東門行半日。唉~ 對我黎講，係大陸買平野冇咩吸引力咋喎！就算幾平都好$10/$20我都唔會係果度買嫁喎！因為返到香港我一定唔會拎黎穿的。以前去過羅湖商業城同埋珠海果d，根本就睇唔上眼呢...我一心想做的，都係去玩o下機動，去遊覽o下咁，搵間正的餐廳食o下，如果個friend有屋的，可以去住o下，或者玩o下煮飯仔。相我就唔會去影嫁啦~ 不過陪人地去影係冇所謂。

其實去溫泉之旅都ok呢~ 2日1夜浸溫泉+附近的地方遊覽。

打保齡

今日一早又出左去大球場學車果度。今日係join左果個『寶馬路線』，係有人會車我地去個路線度走一次。同我同一車的有3個男性，架車好細，大家迫埋一起坐，少不免有d身體接觸。隔黎的男人好大汗，總係覺得痴住佢果邊隻手濕漉漉的，感覺非常之唔好。其實都係用左半個鐘就去晒兩條路線，發覺原來除左唔俾學車果段，其他的平時學車都有開，都係d簡單野。

十一點就完左了。夜晚約左屋企人打保齡，只好先返屋企睇o下vcd了。好在有全月通，慳返唔少。返到去打左陣機同睇左陣vcd，就同媽咪出去了。我地去左奧海城度打，去到叫緊35號飛，我地係83號。嘩！我都估唔到咁多人打保齡，我以為冇人玩嫁啦~ 於是我地行商場想搵間好野食，因為可能打唔到bowling了。我仲去左breadtalk想睇o下個『煲呔曾麵包』呢！不過冇晒lu，每日限賣100個咋~！之前同表哥表妹去食的意大利餐廳都冇埋！唉...都唔知食乜好。老豆放工打黎，話左俾佢聽有排等，一係食左飯再睇o下到我地未law，佢把聲好失望。我小時候佢地都有帶我同妹妹去玩的，當我提話今日去玩的時候佢即刻就話好了，佢睇黎真係好想打。我地再上去睇o下而家叫到咩number，咦？73？2個鐘頭叫左40個number！我地等多一陣就有lane啦！因為肚餓係果度都叫左d野食。原本我諗住每人打一局過o下手癮就食飯，畢竟都係貴的消費，不過話咁快就打完，老豆梗係想再打啦！打得叻ma~ 阿妹因為由細到大都係打得差，唔忿氣都想再打多局。咁佢地再打多局就走了。

我地去左『悅』南野度食。因為食夠$250信用card有九折，我地係度度黎度去睇o下點先至抵。最後都係蠢左~ -.-" 跟住就返屋企啦！都累呢~成個星期都冇訓到晏。

今日有幾件趣事，阿妹打bowling時fing左個波向後！好在我唔係企係佢後面o者~
返屋企果時，阿媽穿左幾廿年前佢買的尖頭鞋，係屋企附近的天橋表演一字馬！haha...因為鞋底d紋都啦~ 所以跣左~ 好在我有隻手係佢shoulder度，佢捉住我先冇真係整個一字馬咋~

呀！仲有！聽左joey同張信哲的演唱會mp3，發覺joey d普通話仲有待加強。係果首『有一點心動』內﹕

我和你 男和女 都逃不过爱情
谁愿意 有勇气 不顾一切付出真心
你说的 不只你 还包括我自己
该不该再继续 该不该有回忆 ‥‥‥

應該係zi，佢讀左zhi，捲左舌~

之後係『愛如潮水』中：

不问你为何流眼泪
不在乎你心里还有谁
且让我给你安慰
不论结局　是喜是悲‥‥‥

應該係xi 不過佢好似讀左shi，唔夠清楚。

學車

兩個星期都冇學過車，我真係怕自己會唔記得晒點開車。由於今次係星期六學，似乎好似好少人咁。前果幾堂都係度學吊離合器，今次終於學窄路調頭同埋泊位了。人好少，可以做左3次，都係要師父幫手踏brake 先得。整體黎講都ok o既。黎緊可以要開始一個星期兩堂了，我情願而家學多幾堂一次過pass，好過之後又考。仲有！上次我約左佢佢失約，今次佢俾返廿蚊車錢我‥‥‥-.-" 收佢又唔係，唔收佢又唔係，真係embrass。

下午返屋企買左d野食俾妹妹食。我試左果個什果撈河 from 許留山，都ok啦~ 原來d河其實係好似蘆薈咁o既野，不過椰汁味的。

d 烏龜成日都唔開眼o既？點解呢？

奇奇怪怪的

今日下午收到eric電話，原來整機果度有部機有問題。個問題好誇張呀！係個admin account 唔見左，上網的setting又冇左，好奇怪。照計裝左norton antivirus +microsoft的anti-spyware+ zonealarm限住邊d program先可以掂個電腦，應該唔會俾人hack左嫁~ 咁的情形似係人為的多過個機無端端神左。我上次整的時候d野仲好好地o既~ 之後我都冇去搞過又冇vnc過，絕對唔係我整成咁嫁啦！不過都過左去睇睇咩事。後來都係交返俾eric搞了。在商言商，我負責的唔包括平時的maintainance 嫁ma，o下o下幫佢走過去睇咩事唔係辦法。不過eric都明o既~ 呵呵~

返到屋企玩左少少flash game就訓了。

壓力好大

今日一早Mario就打黎話我知考到車牌了，雖然死左3次火，但係都冇問題。聽到之後真的不期然就更加緊張了。睇返我學車張卡，先學左3次即係6堂，仲係冇咩進展，真係有d擔心。

下午搞briefing，又係我個program，今次係public的briefing，都有廿幾人黎左，算係多嫁啦！因為好多professor都放左假同埋去左外地開conference。會上真係估唔到有咁多人同埋有咁多問題出現，睇黎仲有好多野要改。個會完左都放工了，講到好口乾，返屋企經過金魚街幫d烏龜買個陽台。其實都唔知邊d先arm，問果d人就好求其的答我就算，我都係好求其的買左一個最細size的石頭型的擺設，返去放係個箱度都佔左一半了。不過好在d烏龜似乎唔係好怕生，好快就爬左上去，有一隻好活躍的，成日爬黎爬去；另一隻就唔係了，怕怕醜醜的只係痴住果棵假水草。

呢幾日都好眼訓，下午就已經對眼好想合埋。仲有幫表哥download Initial D的第一部呢！之前我睇左所以冇download。

仲有mario好似係度暗示佢想『有人』同佢慶祝生日請佢去酒店食buffet呢~ 我...當聽唔到。=p $300~蚊位呀！網上訂有8折，都要$250~啦！Mandy生日...我都冇請...=.=" 對唔住啦~ mario，你都係搵過另一條好心的水魚啦~ haha

強戰世界

今日係度都幾專心咁做code，因為聽日要briefing啦又。阿head同埋一個同事拎左d手信返黎，有綠豆餅同朱古力。夜晚去左銅鑼灣別府食野同睇戲，同之前一樣，食野食到夠鐘先入，咁free seating的戲靚位自然一早就俾人坐晒啦~ 結果坐左係前面第三行，不過都仲睇到。

套戲都ok嫁，聽住d飛彈射黎射去的聲同埋爆炸聲都幾緊湊。只係......個結局真係有d馬虎law我覺得。外星人外星機器一入黎就千軍難敵，人類完全冇反抗的能力。不過原來佢一黎地球就註定會死，因為佢地受唔到地球的微生物/細菌。咁我地人類去月球同火星都會探測果度有冇空氣，適唔適合人類居住啦！外星人總係高科技+聰明過我地，冇理由諗都唔諗，知都唔知地球唔適合佢地就攻入黎掛？

而且初頭主角係地下執左舊石頭好似係特別野咁放左入個袋度，之後又冇講。外星人點解黎地球吸人血黎種樹呢？d樹有咩用呢？真係冇無聊入黎吸血噴血就死？！

ha..貶o下眼暑假的氣都睇得七七八八，真係第一年咁早睇晒戲仲要唔洗俾錢o既~

烏龜

今日忽然醒起要check o下我其他的email account d mail，發現之前整機果度原來有野唔work，而且今晚屋企冇飯食，所以夜晚就決定去整機。放工去到發現原來其中一部vnc唔到，係因為佢根本就冇上網，咁當然係唔得啦！另一部就vnc時有黑畫面，整左一陣，睇黎應該係個norton antivirus block左個vnc，唔肯俾佢入黎。不過都係建議用返remote desktop，一黎可以唔洗裝野，行少個program﹔二黎佢又唔見會俾d咩野block左呀咁。應該唔洗再去整啦掛？

就黎訓果時個妹返黎，佢居然買左兩隻烏龜返黎！天呀！要養寵物的唔該就養貓仔，狗仔或者老鼠仔啦！呢d先有反應俾到你嫁ma！我就真係唔鍾意養魚養龜呢d啦！唉...我想要貓仔同狗仔....不過屋邨唔俾養，所以要買左屋先...=.=" 唉..唔知有冇呢個機會呢~

荒失失奇兵

今日一早就起身因為約左人去睇《荒失失奇兵》的優先場。係ua金鐘度睇，我約左係金鐘mtr度等，點知我個心成日想住太古廣場係太古，於是早左好多起身，去左金鐘站度轉車去太古，當去到天后我先醒起係金鐘先arm，只好返轉頭。好在仲趕得切。去左delifrance度食早餐，差唔多夠鐘先入去。嘩full晒！係頭4,5行的邊位度坐低。套戲幾好睇呀，好幾個笑位。

之後入左大埔同many食野行左陣新達就入左教院了。係我第一次入去咋！都幾清幽，可能因為星期日冇咩人啦！我地去左泳池度游水，唔係好多人，環境唔錯，不過就曬左d，3點到5點幾都係一樣咁曬。我游左10個池呀！一來一點計兩個啦！其中只有一次係一口氣游晒嫁咋，其他我都係中途抖o下休息先再黎過呢~不過人少少我都勁唔好彩，游緊蛙式時上黎吸氣，居然有野扔落我個頭度！我周圍望係度問，邊個扔我！haha..結果個老豆就話個仔唔好亂扔野之後同我講sorry呢。跟住另一次我游游o下忽然見到我前面有個女仔游自由式向住我黎緊，我地差d就頭撞頭啦！我即刻踩水向右邊閃，佢都仲未見到我！！我已經係佢下面了！但係我唔夠氣，一上去吸氣，佢隻手撥水就打落我個頭度，我仲講左聲sorry呢~ -.-" 不過...係我錯咩？！點解佢會睇唔到我..如果睇到，點解唔停手？！嗚....


Google Earth
呢個係上個job的阿head介紹我睇的！真係唔錯，好勁呀！睇到成個地圖的image呀！

Flash
newsgroup搵到的flash, 大家改改個path的parameter就可以拎去tum仔/女了..haha