拜左半個山

好似返工咁早起身出柴灣拜女麻女麻。伯伯繼上次想話託我買電腦之後，今次見面就冇再出聲，反而佢買左電話(Nokia N75)，就叫我教佢上網。我一見到細姑丈，佢就已經係度玩緊個電話，但係佢舞左一輪都係唔識，就過黎叫我搞。

上去閃電式拜山，留係度都唔知有冇20分鐘就走。其實家下拜山都係好形式化，又唔係話上去對住d骨灰傾下計咁，上去都係抹下個牌、鞠個躬、燒下野。落黎就去酒樓食飯。

當落緊山果時，我行係我媽後面，見到佢褲腳有d泥濘，就話佢咁唔小心呀，整到條褲咁烏糟。阿媽就話﹕『緊係你踩我嫁啦！』『拿拿拿，你又冇見到點可以斷定係我呀？』細姑丈係隔離就出聲﹕『你咪嘈。你阿媽話係你整o既就係你整o既。』『點解呀？』『因為佢係你呀媽！』

..................叭嘞！！！..................

真係無名火三丈起！呢句說話係我最討厭o既說話之一，因為佢係你阿爸你要點點點、佢係你阿媽你要點點點、佢係阿妹你又要點點點。家下一件阿媽條褲污糟左o既小事，我同阿媽都係度講笑咁吹下水，細姑丈就插把咀埋黎，好似係度講咩大道理咁！我忍唔住登左細姑丈一句﹕『你又見唔到事發係點，就唔好講咁多野啦！』阿媽就同我單眼叫我唔好窒人咁多，話晒人地新年禮物同利是都有俾我。但係我都係忍唔住頂左句﹕『咁係呀ma。我同我阿媽講野咋喎(關你咩事o者)！』跟住細姑丈就冇再出聲啦。

阿媽同阿妹又話我衰左啦！上次初三見面時同細姑姐唱反調，今次又窒細姑丈。大佬我唔想嫁喎！我最憎就係咁樣嫁啦！擺高姿態幫我媽教女。我唔係幾歲果d細路仔，唔係你講句『我係阿爸，你要聽我話。』『我係阿媽，你食我o既住我o既，我叫你做乜你都要做。』咁我就聽話嫁！我唔排除真係我踩左阿媽條褲整到污糟，係我整咪我整囉！有咩大不了，都係返屋企放入洗衣機洗嫁o者。你可以話我一直都行係阿媽後面，多數都係我整o既；但我就係唔like 人地話因為佢係邊個，所以你就要咁樣。要教仔先教好自己果兩個啦！

阿媽就話我，由細到大都係咁o既。小時候有個姨媽話我唔知咩野，我都係笨左佢一句﹕『你又唔係我阿媽，你有咩資格話我呀？』結果激到姨媽同我媽投訴。

係酒樓食晏時教左伯伯點上網，不過佢識唔識再按返出黎就真係唔知啦。食完野本來要去沙田再拜公公，不過成家人都好累，所以都係返左屋企抖，等呀媽搵日自己去拜返囉。