三門仔海鮮酒家

11點幾就被老豆的聲迫嘈醒，原來佢同阿媽講緊今晚去邊食飯。唔知老豆今日做乜咁好雅興，醒起我仲欠佢地一餐飯，見我地今晚齊人，就想食我一餐。

下午食左蘿蔔糕同黃金糕，睇左陣劇，就出門口去大埔的『三門仔海鮮酒家』。本來話有海景，但係天黑黑咩都睇唔到，又凍就冇坐室外位。可能呢度係庇華利山附近，所以價錢都唔算平。我地食左蟹飯、黃金蝦、扇貝、饅頭、醉蝦。我想食的香竽糯米糍欠奉、蟹糕墨魚丸都冇。龍蝦同魚都太貴，買唔落手。整體黎講覺得ok，蟹飯係最好食的，d飯好鮮甜有蟹味。黃金蝦一般、扇貝媽咪話d汁太濃、饅頭當然ok，而醉蝦都係ok咁啦。

d服務員態度一般，反而其中一個部長唔錯。好似我地問瀨尿蝦點賣，個女侍應話4個人食，斤半啦，計起上黎都要成4百蚊；反而個部長就話你叫一隻4個人食都冇問題，7兩到，百幾蚊都有得食。而且部長會主動黎serve我地，冇事做時又走黎同我地講黃金蝦d蝦要大隻d先好咬口咁。雖然我地一家人都怕怕地同人閒聊，不過個部長人真係幾唔錯。

坐車入去時見到有兩個阿伯係庇華利山落車，真係不禁係度諗，點解阿伯可以住庇華利山？我老左如果都可以住庇華利山就好囉~