被人cup我線！

今日收工收得晏，因為幫mentor整埋少少野先走，反正都係今年的last day，遲少少都唔緊要o既。

收工返屋企附近個機shop，睇下個Wii而家咩價位。lunch時d同事講好似2千幾就有交易，上網睇d人都話日本賣$1600，係香港買貴幾百蚊都好正常o者，運費都要啦！而且香港仲唔知幾時先出行貨。早d有得玩都抵返晒~ 咁諗諗下又好似係喎。日文定英文機呢個問題令我爭扎左好耐。日文game公仔又靚d，game又好玩d，又快出d，但係我唔識睇日文；英文game我識睇呀！但係我又好唔likey美國公仔咁醜樣，仲有d game又唔好玩，日本game唔係隻隻都出美版，有時出都要等好耐先會出。企係機shop門口，我都立定心係日版機嫁啦！問一問價，$2080！咦？acceptable喎！又有現貨。行返去火車站拎現金，打俾屋企人叫佢地等多陣。點知就出事！

一聽我話買機，阿媽就係咁"哦"話我唔好買，唔好俾人呃。跟住阿妹又話乜話乜，到返阿媽時佢仲出絕招『我唔知你！(噗！)』收埋我線！大佬呀！我洗自己錢買我自己鍾意的野，係我引頸以待半年的遊戲機，我買o者~ 都要俾人粗暴、冇禮貌、近乎恐嚇的對待！咁我可以點呀？個SHOP又唔係聽日唔開，聽日再黎買囉！

返到屋企，阿媽笑X顏開。梗係啦！cup線收效喎！個女冇買機就返左黎喎！仲唔happy呀？！咁經過我多翻說服，當然聽日就去買！阿妹窒我話我好打返屋企問佢地意見先買機，自己拎黎俾人罵。大佬！我冇打黎問你地意見嫁！我只係好交帶，費事你地等咁耐唔知開飯唔開飯好，講聲你地知我係邊做緊咩咋！咁就招來責罵啦！

買部機o者~ 又話俾人呃，又話亂洗錢，洗唔洗咁大陣杖呀？！