慶烚烚的冬至

柴灣紫荊大酒樓

今日冬至一早就book左位，7:00正我地準時到達就叫左一set晚餐。跟住就等，等好耐都未有第一碟乳豬黎。由於我地係偏廳，出去見大廳都好多人等緊，咁好啦，比d耐性，今日旺日廚房做唔切，等下冇相干。點知一等就一個鐘先黎個乳豬。

好啦，乳豬食完又等。之後幾樣野都係等成九個字至一個鐘。已經同阿姐催左好多次，佢都只係識講整緊。你估條魚而家先去捉返黎咩！？定係燸米飯而家先去田度收割返黎煮？！結果我地係度坐足4個鐘，由7點坐到10點半，都只係黎左5樣野。d細路都頂唔順訓晒覺，大人一個鐘食果小小根本就唔覺得有食過野！

我地同隔離桌都係一樣。出去大廳眼見得返一半客，為何我地d野都仲未上黎？於是同阿姐嘈，又捉個部長話。一話完十分鐘，條魚先識游過黎，d燸米飯同伊麵好似唔洗再由小麥整麵條啦，終於可以上到table。

從未試過食餐飯要坐足4個鐘，一個鐘食一件蟹鉗，一個鐘食一條菜。成2千蚊一個set，卻食到好似飢民係度等救濟咁。直情好似非法禁錮，走又唔走得，食又冇得食。d阿姐只係識講唔好意思，話催左，但係個部長又話d阿姐唔出聲，我就真係唔理得佢扯貓尾，總之你做得食市o既，收得我錢o既，冇理由要我好似乞食咁！

嘈左一輪，既冇送包/糖水/生果安慰我地，亦冇給予折扣優惠。最快手就係收錢果一刻。大佬呀！你估間野煮的係山珍海味、鮑心翅肚呀？！野食貨色只係一般，服務態度又差，持住果區係得果兩間酒樓呀！？

下次真係唔會係度食。唔係就我出世冇耐的堂妹近近地，我都唔會係度食！