又上一課

今日我係屋企煮公仔麵時因為湯太滿了，倒走多餘O既湯時，唔小心燙傷兩個手指頭。100度的滾湯，令到我十分的疼痛。第一時間我開了水喉向傷口沖水，就開聲問媽咪屋企有冇燙火膏。媽咪剛下班回來正在洗澡，而阿妹就食緊媽咪買返黎的外賣。阿妹幫我拎左獅子油同棉花，就出去繼續食飯。我右手沖緊水，左手根本就拎唔到係右邊牆後洗衣機上的獅子油，更唔好話要單手倒油落棉花。

望下係廳果個人，忍住D眼淚，但忍唔住心中的不快。而家我燙親，成屋人得係廳果個係唯一可以幫到我的人，但佢就咁放低D野係我拎唔到的地方就算。我以責怪的聲氣話﹕『你可唔可以過黎幫我倒D油呀？你都見我燙傷要凍水沖住，都拎唔到D油，你都仲可以出去繼續食飯O既！？』『喂！你要搽油，你都要離開個水龍頭先搽到啦！我點知你唔離開得個水龍頭O者？！而且你見唔見嫁？我食緊飯嫁！』噢！原來你食飯係咁重要，重要到可以置需要你幫手的親人於不顧。

到阿媽佢沖完涼出黎啦！佢除左問下我傷成點之外，就係叫我出黎食碗麵，唔係D麵發大晒。大佬，我傷左手指頭，痛到喊緊果時，你仲要我快D出黎食左碗麵佢，唔係碗麵就發晒大，晒左。燙傷係要用凍水沖30分鐘嫁，點出黎呀？而且我痛到都冇胃口食麵啦！聽到我話要沖30分鐘水黎消腫，『唔係呀？開住個水喉30分鐘？！』oh!原來水費同碗麵，比起我燙傷的手黎得重要。

後黎老豆買左藥膏返黎，塗左上手，離開水後的疼痛感消減左唔少。傷左半個鐘頭，阿媽先話，係喎！你返工要用手打字嫁喎！係囉，我靠對手搵食嫁！你而家先知呀？

吵左一大獲，關了自己係房。聽到出面阿媽勸阿妹忍下，話我受左傷亂發脾氣。阿妹話我應該好聲好氣求人幫助，佢唔係奉旨要幫我的。哦？我以為親人之所以為親人，就係大家之間的關心同照顧，係唔需要請求的。我見你整親手，會走埋黎問你有冇事，幫你拎膠同紙巾。我見你叫肚餓，我會問你批個APPLE俾你食好唔好。原來即使你見到我整親手喊緊，都係需要我好聲好條咁請求你，你先至會黎幫我。即使見到個朋友面色好差，都會去問佢洗唔洗去醫院啦？若果你明知你老公整親，係咪都係坐係度繼續食飯，等佢叫你幫手你先會幫手？！老公係同你冇血緣關係的，但我係同你日對夜對同一條腸出黎的。

我唔覺得要求親人給我應有的關心同幫助係要求太多囉。我更加唔覺得我係度亂發脾氣，但係我阿媽話我係。阿妹話阿媽如果唔入黎同我講清楚，我會以為自己ARM晒。係囉，係我錯囉。我讀屎片大，以為親人係會無條件的關心同幫助我的。我識埋D豬朋狗友，人地見我唔舒服係唔洗我叫晒救命同唔該先會幫我手嫁囉。唔單止咁，我仲俾人縱慣晒，向屋企人要求D唔應該有的野囉。

阿媽冇過黎指正我，但佢同樣都冇入黎安慰我。如果你話佢同阿妹講的野係想COMFORT佢，等佢唔好再同我嘈，咁點解佢唔會入黎COMFORT我，叫我唔好咁諗個妹？從頭到尾，我只聽到一句。

佢係咁嫁啦，你知嫁！

老師教我唔ARM的要改，但係阿媽教我，要接受。