星馬旅行(一)

5月20日

香港 -> 吉隆坡 -> Tune Hotel -> 首相府 -> 粉紅清真寺 -> 康樂花園夜市(Pasar Malam)

一早6點幾就出發去機場，係巴士度阿妹首先就唔開心啦！因為佢唔記得左帶一隻公仔。我地早左去CHECK-IN就入閘食個早餐行下免稅店先。今次旅程我地坐兩間航空公司，馬來西亞航空同埋AirAsia，都係因為我地選擇最平機票的考量。而今次我地先坐馬來西亞航空。

上到機發現人少得可憐。到真係起飛時，全機數埋都得20-30個乘客。我真係第一次見咁少人坐飛機。一見到咁少人，大家就唔跟位坐，完全係可以前三行後三行都冇人。咁人地有咩事，我都唔洗俾人隔離啦！咁情況我相信飛機餐都會有好多淨，一人食幾個都得！可惜個餐唔係咁好食，所以我地都好安份。

飛機中發生第一單『魚』野。阿妹佢放左杯橙汁係枱面，就挨後訓下先。點知坐係佢斜前面的阿媽，見到空姐送餐黎，心急興奮，想叫阿妹起身食(雖然我同阿妹一向都唔多食飛機餐)。佢就伸手『逗』阿妹張枱一下，咁就死啦，杯橙汁潑左落阿妹條褲度，激到佢死。由於我同阿妹都訓緊，事件一發生，都直覺以為係坐係阿妹前面的老豆忽然挨後張枱搞成咁，所以阿妹一開口就話老豆。昭事者一粒聲都冇出，食死貓者都係啞子食黃蓮。到阿妹去TOILET整整佢時，食死貓者先同我講個真正元凶！

咁最後緊係有為老豆澄清返啦。不過條褲要穿幾日嫁ma，唉~

見阿媽咁慘，第一日就闖禍，我好心就幫佢問空姐拎多幾包花生小食。你知啦，佢係貪小便宜就開心嫁啦...

到左吉隆坡國際機場KLIA，我地坐接駁車去隔壁的廉價機場LCCT。因為我地今晚住的酒店就係LCCT隔離，叫做TUNE HOTEL。第一次試住廉價酒店，因為今次自由行係以慳為本的。平價機票、廉價航空、廉價酒店，我地要試下慳呢D錢，住又住得O唔OK。

TUNE HOTEL 外表上看黎都幾好，幾光猛，而且因為佢開業冇耐，所有野都好新淨。樓下又有7-11同埋餐廳，半夜唔洗怕係機場地方冇野食。不過一開門老豆就『嘩！』一聲，做乜？嫌細囉~其實BOOK之前都俾佢睇過晒D相，同佢講左冇洗頭沖涼液、冇風筒冇冷氣、房係張床、洗手間同4格階磚嫁啦。因為我地第日早機，今晚又夜訓，訓得幾粒鐘，都唔洗咁介意間酒店大唔大啦。好啦。放低晒D野，就坐車出去觀光。

車站D人都聽得明英文，問路都唔難。反而係聽佢地D英文難D，D音快快地咁。坐Airport Transit去到Putrajaya站，再轉巴士摸摸下咁去到首相府，烈日當空，都係要影嫁啦。阿媽佢食咩玩咩都唔緊要，最緊要係有影相！好在個粉紅清真寺就係首相府隔離，唔洗行好遠。不過我地都冇入寺入面，因為我地幾個女人都冇穿長衫長褲。影到差唔多，我當然係第一個頂唔住肚餓，食左少少野，先出發去夜市。

30幾度的天氣真係好難頂，係香港從來都冇飲咁多水。去到夜市時，我早已經汗『笠笠』，見到咁多人咁逼又咁熱，我都冇心機周圍行周圍試。不過都係有試野O既。試左臭豆腐、中國漢堡包、青龍包、大串薯片、豆花等等。

臭豆腐都OK好食，不過佢用的汁幾特別，係酸辣，酸多辣少，仲有酸菜添！至於個中國漢堡包一般啦！我身為中國人廿幾年，真係第一次知中國漢堡包係咁O既款。青龍包就似係斑蘭蛋糕夾住D花生砂糖咁。至於薯片就冇咩特別，屋企樓下間榴槤飄香都有得賣，係佢幾個冇留意唔知O者。豆花得個甜字。

呢度D人多數都係華人，所以講國語的多。青龍包老細仲識講廣東話，佢見我地影相，就同我地話，FACEBOOK見！ =.=" 佢又知O既....?

成個夜市實在太長，而且又好多地攤賣野。仲要窄路中有乞丐訓係地行乞，我真係好懷疑佢地咁樣訓係度，會唔會窒息定係俾人踩死。後黎我地食埋個叻沙就坐車返酒店，十點幾月台已經係冇晒人。可能我地呢頭算係近郊，所以咁掛~

返到酒店老豆又『唏！』原來係因為冇風筒。之前咪問左洗唔洗帶風筒，大家又話唔洗，而家又係度唔滿意。其實佢果度係有風筒，俾錢咪用得囉，MYR$2即港幣$4。我咪問佢想用俾咪錢囉，呢$4我冇要佢慳，但佢又話唔洗。老人家好鬼難服侍的。

本來擔心天氣咁熱，係咪要俾錢去開個冷氣。不過原來房入面個風扇都好夠，沖左涼訓係床度都涼涼地冇咩汗。由於我地唔記得帶紙杯做漱口杯，而果度又冇水杯，所以我地只好派個年紀最輕，衰左都會有人原諒的阿妹，去7-11拎兩個思樂冰杯返黎。不過阿妹佢都事敗呀，俾另一個住客係度叮野食時見到。冇嫁，我地咪面黃黃咁拿拿聲走囉~

呢D係咪就係 Problem solving同risk management?HAHA