生日k聚

阿清同brian約左d朋友同我係今晚慶祝生日。其實早於一星期前brian就問過我幾時得閒食餐飯，結果約左今日唱k。聽到佢約的人名之後，我就覺得興緻唔係好大，因為有熟有唔熟。尤其係阿寶！我同佢都冇野傾o既，出黎真係你有你唱？！由於terry都想約我星期六食tea，我就索性一次過去佢地今晚搞埋。

去的人有阿清, brian, author, 阿寶, tt, gary。leo, 阿峰同業仔都話黎。後黎係外國剛回來的king都黎join。結果7點到我地上去唱住先，阿清佢地去買埋halloween d衫先黎。成個晚頭都過得一般，一黎上星期10月1日，我就已經同阿清, gary, author, leo唱過k了；二黎同大家冇咩野講；三黎我一心就諗住唔多唱歌留俾人地唱。尋晚author話想唔黎的時候，我都想話cancel嫁啦，都係因為d人唔熟。不過又覺得brian真係好有心幫我約，都係想同我慶祝，我唔俾面唔好。

9點半想話同leo走先，因為佢第日要返工，而我都有d累。點知一搞就搞到11點先走得。author brian都同我講唔好再同terry一起唱k，其實我都明點解o既。terry佢唱左勁多歌，首首都爭住唱；有d人黎左食左野，歌都冇唱過一隻就要俾錢走，我都覺得對佢地唔係幾好意思。而且喜歡唱歌的我地，都喜歡人地聽到自己唱歌的聲音，但係terry佢有理冇理都唱，搞到brian聽唔到自己唱歌好頹。

king 順手送左兩包入微波爐叮的爆谷俾我，而terry就買左兩條手鏈俾我。從包裝同款式上看得出，係旺角中心廿蚊兩條果類手鏈。拍得住上年定再上年我小學同學leo leung送俾我o既小學抽獎必備木框相架。

**********************
杯葛別人唔係咁好，我都明白。如果我係被杯葛的我都會唔開心。但係人都係有權選擇同咩人玩同咩人交朋友o既，又唔可以算得上係自私。冇理由我唔鍾意同佢玩，為左唔令佢難受，都要逼住次次叫佢出黎玩嫁ma。只要唔好好似小學咁幼稚，唔鍾意果個人仲要玩人、蝦人，我覺得都唔係咩問題呀！人同人之間總有熟同唔熟，arm玩同唔arm玩嫁ma。

只係冇人會同terry講點解，好似冇人會同calvin講、冇人會同阿水講點解佢地活動唔再叫埋佢一樣。