外快

放學原本去上堂，不過個阿sir次次都拎大半堂黎重覆上星期的notes，剩下的半個鐘先講新notes，攪到大家都唔多願返。(...係，只係我唔多願返o者...) 而且今日有任務，就係賺返我買護膚品的錢啦！

放工去左銅鑼灣參加市場調查公司的一個座談會。上次參加時因為人太多，我沒被選中，所以即時就拎錢走人。今次冇咁好彩了。去到要等埋其他人先開始，不過好在有電視有晚餐呀飲品呀零食呀供應。下午食左野所以好飽，不過我都有食下盒星洲炒米o既。

今次個調查係關於保誠一個新推出的醫療保險。其實我都有想過要供返份，一黎政府會漸漸的將醫療開支俾返市民負擔，有份醫療保好似會好d咁。不過我一向都唔多病痛，好好地地走去供死會，又好似蠢左d咁。今次聽下呢個新的醫療保究竟有幾咁新。

成個plan一開始都幾吸引，因為佢有折扣積分優惠，好似唔錯咁。其實即係佢有張list講明有做d咩就有幾多積分，如果有幾多積分，下年的保費又可以有幾多折咁。我地有8個人，最後生唔洗講就梗係我啦！3女5男，大家俾分，有人俾10分我就俾得6分。大家都提出左好多疑問，因為佢話要做運動拎積分，but要係伙伴公司做運動，咁咪即係tum你入會。仲有呢！又要打針，又要身體檢查同埋體檢，呢d邊個俾？！玩下手我俾錢出黎做檢查，仲貴過佢俾我的折扣！仲有佢每年保費的加幅，如果多過個折扣，咁咪又係即係加左保費。

當然睇到最尾，就梗係如我地所料。折扣只係個啅頭，其實變相自己要拎錢出黎做檢查先換到d積分，即使冇積分可獲的25%折扣，都仍然係cover唔到個保費的加幅。唔洗額外俾錢而拎到積分的少之有少。大家都覺得唔抵，我覺得佢係有推動我健康的作用，不過如果係建築於我要付出更多的金錢上，而所能享有的保障又只係同其他一般的醫療保一樣，咁呢個plan的selling point係邊呢？以無索償折扣為名，其實又名不乎實，最後佢問我地對呢個plan的感覺，我都好想出聲話『呃錢！』，不過又唔好意思。只係講左我就一定唔會買。

8點幾完成左，收左錢就返家早d抖lu。