整角仔、大出血

6點半就起身，因為今日要去大姑姐屋企整角仔。正於梳洗其間，忽然鼻血直流，我花左4-5個字先至止到血，血染洗手盆。7點幾8點，跟媽媽到海皇粥店食早餐，吃了一舊炸兩，低頭喝口粥時，又流鼻血！搵隻碟就住，但係我一直捏住個算都仲係止唔到血。d阿姐又俾紙我，又話流到bar bar聲，唔得啦唔得啦咁。我都有d驚係咪有咩不治之症做乜捏左咁耐都仲流。阿媽帶我坐的士去北區醫院睇急症。

激氣野就係度啦！去到急症室，姑娘叫我登記，另一個分流護士就走黎話我捏鼻方法錯。我本想叫住阿媽唔好登記，慳返一舊水，我就唔信佢唔教我止血！咁結果梗係有俾到錢啦。之後就到分流護士個位度，佢串到死，話我止血方法錯！有冇搞錯呀！自小都係咁學嫁啦！邊有可能錯！我都冇聽d阿姐話仰頭啦！應該係俯頭，捏住鼻樑嫁ma。我已經諗住直接壓法係要按住個傷口嫁ma，鼻樑可能有骨頂住，於是我捏鼻骨落少少。咁都仲錯？！

拿！而家教精你地啦！係我付出$100，再加承受分流護士『串串共』先得知的『止血秘笈』呀！護士教你呀！抹晒之前學的野呀！而家佢教你，要捏住個鼻翼，再向臉壓，用口呼吸，直接壓法你曉唔曉！？當我個first aid流嫁喎佢！我問姑娘直接壓法係要直接壓住傷口，我點知鼻腔邊忽有傷口呀？！護士就冇好氣的話﹕『我教你係就跟住做啦！』 XY佢個Z！我有跟住做呀！不過我有求知慾嫁ma！俾左一舊水問多幾句都唔得呀？

最後緊係15分鐘到就止血走人啦！

跟住咪去大姑姐屋企整角仔。點幾到就返返入中大上堂，差d訓著左。夜晚係屋企整指甲。