Uwant 小聚

VEE打黎話APRIL約食飯，OK啦！自從9月佢生日聚會，之後好似上過佢屋企一次，就冇再見。又OT左咁多日，今日就去見下朋友啦。

去到見到VEE、RYAN同OSCAR，衰人RYAN，竟然當街大叫『肥妹』，而我又好死唔死，反應好快咁望過去。俾佢地勁笑。RYAN帶領下，去左始創中心後的『本家』日本料理度食，佢話好食喎。入去坐住等先見到原來9點後有半價，於是就問個經理點計，我地等埋朋友先食都等到9點。個經理過埋左張單咪得囉，我心諗arm arm先放左杯茶，野都未叫埋咩單？RYAN就話要俾茶水錢，我就覺得奇，而家飲茶咩！有茶芥嫁？！ 再搵經理問多次，我咪話由入座計，咁我地而家出返去，9點先入黎入座。個經理話唔係唔俾你坐，埋左張單9點後另計。嘩！野都未食埋咩單？幾經商談後，經理先講『我係話，如果你9點前叫左野食，就埋左張單先。9點後再另計。冇叫野食咪唔洗囉。』真係激死。

等下一個等下一個，終於9點鐘D人先黎晒，有April, Vee, Kin, Oscar, Ryan, Author。今期講RYAN同女朋友復合後的非人生活，又講下APRIL新男友。埋單每人$158，我睇下張單，得幾樣叫左9點後半價的野，其他全都係正價。咁怪之得咁貴啦，D男仔真係唔識叫野食的。唉~

成晚都冇咩點出聲，一黎好累，二黎我坐係VEE同KIN對面，真係受唔住阿KIN。佢講野勁大聲，成間餐廳俾佢整到好嘈。仲有佢又係句句都要話阿VEE蠢，真係受唔住呢D要係人面前SHOW OFF自己幾醒、女朋友幾蠢的男仔。一，佢唔係真係好醒；二，唔鍾意D男仔踩低別人抬高自己，果個仲係佢愛的女朋友；三，佢女朋友都唔介意果度先死。

即係咁，VEE問﹕『魚頭係咩魚黎嫁？』KIN答﹕『(勁大聲)魚頭都仲要問係咩魚？！唔係呀化！咁你都唔識？......』但到最後佢都係冇講到呢舊魚頭係咩魚黎O既。佢識唔識我唔知，但有必要當住咁多朋友面前踩自己女友嗎？VEE一向都係低低BB咁問埋呢D問題嫁啦，我覺得KIN就係因為可以係VEE面前認叻，令佢好有滿足感，佢地先至會夾。即使佢問的係蠢問題，男朋友唔可以好SWEET咁摸下女朋友的頭，小聲咁係耳邊講﹕『果D係三文魚魚頭黎嫁，傻瓜！』咁嫁咩？！