tea buffet + 火鍋

尋晚返屋企都幾夜，諗住都唔會搵到leo，點知有人起身痾夜尿睇到我msg，hahaha。約好左今日下午去食tea buffet。

2點多到左葵芳，leo買左新電話，係htc呢！我d同事都有好幾個買呢部，呢個價錢有pocket pc phone，真係幾抵咁呢！不過我個電話仲未壞，之前聽唔到聲係因為個鐵片鬆左d，冇插hand free又當左我插住handfree，而家冇事lu。

我地去左...應該係新都會廣場5樓，果間relaxing tea house度食tea buffet。我覺得外面環境好d，因為我鍾意白色為主的傢俬，不過我地坐係入面。$75個tea buffet覺得都幾好，除左有熟食如豬扒、雞肉、螺絲粉、菜等，仲有cheese cake3款、waffle、飛碟、龍蝦湯、jelly糖等等。當中龍蝦湯不太好食，其他我都覺得幾好。仲有食到雪糕添！結果我食左唔知幾多round，肚都漲晒先走。

送左leo返大陸之後，我就同表妹們去左九龍灣mega box的德興火鍋度打邊爐。早就表明我好飽，但係阿妹同rebecca表妹狂點，咩都叫黎食，田雞又試、鴕鳥肉又試，叫到一個table都係。食淨就一定嫁啦！不過都唔算淨得太多。埋左單就行megabox，rebecca仲可以跳黎跳去，不過我地幾個老野，挺住個大肚腩，只好慢慢的散步跟尾lu。

佢地買左d野，走的時送埋rebecca返屋企，我地都要11點幾12點先返到屋企呢！

本來係可以打俾leo o既，不過，只係一晚o者，聽日傾返電話都可以啦！