『師奶』後感

成個劇分成左好多段。其實食無線劇集長大的人，應該會成日會心微笑，尤其佢提返d對白。經典對白入面，除左大契的『呢度唔係法庭...』之外，好搞笑地『你今日累唔累呀？煮個麵你食呀？』都係經典對白。咁又係真喎！我覺得真係有可能每個劇都會講呢句！haha，當詹瑞文扮的師奶喊住咁話﹕『我唔鍾意食麵，做乜要逼我食呀...』果時，我真係笑爆！

咁多個單元內其實我最喜歡的係『智能飯局』，亦都係唯一一個詹sir以男裝出場的一個單元。正如詹sir咁講，我真係覺得係一個女人扮緊男人，可能佢扮女人太入戲，把聲嗲到我同leo都頂唔順起晒雞皮呢！『智能飯局』諷刺得好易明，成個飯局真係係度挑戰我地的智能。主持人問的野係好普通，甚至算得上無聊。記得之前睇過一集係梁詠琪的專輯，志雲問佢同伊麵的事，當時早就過晒氣，而佢問的問題又係人地問過晒的，gigi答的都係之前答過晒的答案，但係gigi同樣係哭得肝腸寸斷。講到一半志雲又話呢道菜點點點，其實個節目係介紹菜色，定係訪問藝人？睇完成倨專輯，我都唔覺得我有更瞭解到gigi呢個人。就好似單元中最尾一句一樣，呢個訪問究竟俾左d咩觀眾？

唔記得有幾耐我已經冇追劇集、冇睇台慶、基本上電視都唔多對住。睇左廿幾年電視，其實真係有d悶。尤其係台慶，我就最討厭！對上一次台慶，我睇左幾分鐘，佢不停的懷舊，搵左d劇的演員企係度定格，俾d主持人玩。扔蛋糕定係寸人，都覺得好悶。一黎主持人講的野冇咩好笑，只係想搵個籍口pat個蛋糕去個演員度；二黎個演員又唔係show專業，定格的佢都一樣都走黎走去；d觀眾只係呆坐係度睇佢地互扔，係超級咁無聊。

整個劇當中唔難搵得出身邊師奶的影子。好似主角買LV, Gucci就猛話平、抵買，但轉個頭去街市買餸就一角都唔可以蝕，少少都話貴。而同老公傾電話果時又係，電話冇響就好想老公打返黎，又喊又tum又pray，但係當老公打返黎時，一起手就罵做乜唔打返黎呀死佬！haha 真係勁似！

睇左本小冊子，又深的明白成個劇想表明d咩。自己睇時都知佢一直係度諷刺tvb，話係tv bullshit，好搞笑有一度話要研究點樣將d idea變做shit，同埋將shit變做idea！最後個單元講主角親手殺死左四十歲生日的丈夫，當時就知道係指tvb，而個感覺係好傷感好唔開心，而唔係恨不得佢死的感覺。正如劇本身都係想tvb改好，而唔係想佢死一樣。

師奶呢個稱號，林奕華解釋得最好，我好同意。師奶係指d目光短淺的人，她只看得到自己的家庭，並以維持到一個家庭而自傲。要做師奶，先要有個老公。但係師奶卻又係持住自己成為左師奶，就安於現狀，甘於做目光短淺的一群，每天都係浸淫於換湯不換藥的劇集入面。

好似我媽媽咁。今早提到想睇下仲有冇地方幫人改wii，佢話幫我去睇，妹妹提醒佢因住俾d卧底警察捉佢，佢就話﹕『咩呀！我唔知犯法唔得嫁？我係師奶黎嫁咋喎！』

...師奶犯法冇罪呀？自認係咩都唔識的師奶，唔通係社會上會得到厚待？！