向世界出發 -- 女兒國

近黎成日都睇到訪問呀梁詠琪。前排係重播的『志雲飯局』聽佢講同伊健果段戀情喊到九彩，呢幾集的『向世界出發』又係訪問佢，問得佢都係問感情野，都有少少厭。不過我聽d唔聽d，講女兒國流行走婚的風俗。當中訪問左一個城市的女仔嫁左俾果度的男人，初聽仲期望係一個奇蹟，即係個女人嫁左入去好幸福呀咁。點知原來個女仔都係一個悲劇，一個人嫁左過去，男家d女人唔likey有外來的女子入佢地的母系家族。而個男人又係唔話得事的，慣左由女人做主，咩事都做唔到決定。一個女人受咁的壓力仲要養個仔，男人又唔會有責任去養佢，真係唔知嫁左過去為咩！

主持分別的問男人同女人。男人話仲係走婚好，覺得結婚係無形中死死咁栓住兩個人，佢以過來人的身份話結婚真係唔好。耐唔耐見下都唔知幾happy。個女人反而向各個女人講，結婚都係要搵個識得體貼你的男人，唔好俾愛情沖昏頭腦，相處都係一個重要的問題。由此可知，呢段係一段失敗的婚姻。

個節目最後果句個旁白話﹕『如果愛並不包括責任同承諾，咁仲算唔算係愛？』都幾耐人尋味。