團年飯

一早起身就要化妝，準備下午表演。我聽足d同學仔話叫我穿d鮮色d的衫，比如係紅啦，同埋唔好穿牛仔褲牛仔裙呀咁，仲有女仔最好就穿裙。

12點半到就起程去馬鞍山廣場，點半到就去到見到個台啦。個台基本上應該係長期都放係果度，係個商場o既。而佢地只係放個banner上去o者，鬼咁細。報左到，我就坐埋一邊repeatly咁聽我隻表演作品，因為我好怕會唔記得歌詞。我完全覺得俾d同學出賣晒咁囉！個個都穿左牛仔褲！d男仔唔係黑就係白，攪到我地幾個(唔止我一個被出賣) 穿得紅當當，勁怪相！原本話2:30開始，點知又未得，因為佢地冇帶用電腦駁audio的線，所以又要等。屋企人2:30就到左，原本話同我影相o既，點知阿妹又話想去維園買豬腩肉cushion，最後我都係放左佢地走囉~

差唔多3點幾，阿sir先拎d線到達。出show時唔好叫佢阿sir喎~ =p 跟住就開始個rundown。我排係中段，所以我就坐係台前一邊睇一邊放鬆心情。睇左兩part solo兩part串燒歌，我個人覺得水準一般。雖然所有表演者我都見過，不過唔係個個都我都聽過佢地唱歌。有d得開獎的唱得係唔錯，但係大師兄同埋d成日出show的同學，上到台都係會失手。好似甩咀啦、入錯位啦，原本唱得唔錯，都總係因為唔記得歌詞同埋入唔到位而大打折扣。由其係zero，佢串燒歌果度先唱4-5句，成part歌詞都唔記得，只好係度傻笑，師兄ricky即刻幫口唱，但係zero同ricky唱的歌詞居然係唔同的，仲顯得zero唔識唱。你知啦，唱經典電視劇金曲又或者係梅姐d歌，咁為人熟悉，最吸引街坊都唱錯，我覺得係最大的失敗。吸引街坊留係度聽就靠呢d歌啦ma！

4點多時俊文上去唱，我就走去後台再聽多次首歌，就準備好心情出場。原本我係個dance 組的dance performance之後先唱o既，點知佢地未換得切衫，我只好唱左先。well，我唱得...一般啦，聲音有d緊就實嫁啦，緊張ma。不過我覺得自己唱得都ok，因為我冇入錯，而且我仲有顧及台的各方，一時向呢邊唱下，又向果邊唱下咁。到歌的尾段我都係有幾粒字唔記得左，不過我都扮作冇事咁唱埋先。落左台即刻入後台飲啖茶定下驚，頭先唱緊果時沙律俾左個good手勢俾我呢！5點到個show就完左啦！最尾大家上去唱左幾首新年串燒歌，即係財神到呀、迎春花呀果d。有個師奶居然走埋黎...當然唔係問拎簽名啦！佢係問新年冇野派呀？！haha，『冇喎！』

等埋大家執好野，師兄ricky走埋黎話今次呢個show，好幾個都係第一次出show的同學仔之中，我的表現最好，最穩定，其次就係阿roy。俊文出過幾次show，但係上到台，雙手震到好似彈結他咁，俾我地笑得好犀利呀！

之後我就同佢地say bye去左姑姐屋企食團年飯。又話買盆菜，結果都係自己煮。姑丈個電腦中左毒，個ie開唔到出黎。佢以為裝左spyware就連病毒都防埋！唉~ 咁我幫佢check左一陣毒，因為d表弟猛嘈要打機，最後我都係建議佢reinstall個window xp 睇下得唔得，不過佢prefer唔用ie，用firefox算喎！咁是但啦~

食完飯個心十五十六，因為夜晚我地係大埔超級廣場有倒數show，人地邀請我地去同街坊唱歌倒數。kathy叫埋我一起去，但係媽咪話初一唔準洗頭沖涼，咁即係唔可以去啦！人地個show去到1點嫁ma。結果我媽自己反而破戒，同姑姐打牌過12點先返，仲沖埋涼！我同妹妹同老豆返屋企囉！

開始左睇Prison Break第一輯！