球愛可人兒(She's the Man)

放工去左佐敦果間漫畫店度睇左陣漫畫，等埋朋友去左新世紀food court度食d野先入場睇『球愛可人兒(She's the Man)』。我只係食左碟油菜咋！因為下午食左大餐魚生飯定食仲俾人窒呢！果個d位好窄，咁我食緊果時有3個中學生拎住好大的書包坐埋係同一張table度。佢地一邊講野一邊指住我杯野飲問係咩黎o既，因為唔係問我我都冇答佢。點知轉個頭個死肥仔係度單打我！

『一個人食野都食咁慢，慢吞吞食雲吞』

嘩！點教仔嫁？咁冇禮貌o既？我都係俾錢食野嫁ma，女仔食得慢好出奇咩？真係，都唔知咩學校的學生黎o既。

原本係睇『鬼域』的，不過好似『球愛可人兒』的影評超好，所以都係睇左呢套。真係好好睇呀！極力推薦！男主角真係幾靚仔呀！而者女主角Amanda Bynes 男生打扮好正！真係好似cute的肥仔。第一次見佢變左男仔果時真係認唔出，都以為係搵另一個黎拍的，但係眼有d似。雖然冇成場都係度笑咁誇張，但係都好多笑位。不過我隔離個女仔真係好誇張，初初開始我都未笑佢就haha咁大笑仲典晒身咁呢！朋友隔離個女仔又係，笑到離晒譜。

成日發白日夢果時都有發呢d咁的橋段。即係睇完slam dunk覺得流川楓好型，我就會幻想某日我女扮男裝入左佢地同一間學校入埋藍球隊，打得好過晒佢地仲同流川楓好鬼死合拍。=D