中學聚會

講得咁好聽『中學聚會』，其實係中一至中五甲寅年的3人聚會，有海龜(唔知仲有冇人咁叫佢)、yvonne同我。我地夜晚係大熊本度食dinner同傾計。其實中學時候都冇話點樣交過心嫁同海龜，我的記憶就只有我打佢同蝦佢的片段，仲有佢同馬薯打交同埋坐我隔離位的事、呀！仲有佢係紀念冊畫左cartoon公仔的事。不過今晚都傾左好多野，中學時期暗戀過幾多個人呀、拍過幾多次拖呀、色狼的經驗呀、返工、緋聞等等。一傾就傾足3個鐘，到10:30先至走。走的時候仲有係樓下影card同貼紙相，我好耐都冇影啦！對上一次係......3,4年前啦！我地走的時候已經12點半，都預左冇火車呢~ 結果坐van仔返屋企，返到屋企都兩點啦凌晨，好耐都冇試過返工仲玩咁夜先返屋企。佢地就冇所謂啦，兩個都唔洗返工，係我要o者。不過都估唔到會咁多野講，都傾得幾開心。下次見面或者會係農曆新年，到時叫唔叫埋馮宏傑、賴俊傑果d好呢？

呀！海龜係我中一至中三其中一個暗戀對象呢~ ha...冇錯，係其中一個咋，因為我花心ma~.~ 今日有同佢講我暗戀過佢呀！算係為過去的自己了左件心事啦！(講得好誇張咁~)