好多日都冇寫日記

係呀！好多日都冇寫日記，因為真係冇咩好寫。日日都係返工同放工啦，又冇咩得意野發生。

10號星期五
學車。不過唔係得掂。放工好趕咁去坐巴士，加上少少塞車，去到都遲左一個字。一上去佢就叫我斜路開車，佢以為上堂教左！我同佢講未教，佢就即刻教，叫我試。因為個人都未平定，忽然叫我開車，停車，而斜路開車停車又係唔同的做法，令到我好亂，只有聽佢叫我踩break我就踩break，加油就加油，完全都唔記得咩時候同點解要咁做。不過到尾段就開得好d，因為係返上次開開的路上走，我都記得大概要點做。好懷疑到考試時，忽然去個未去過的地方開車，我係咪真係好識得點做。

P.S. 個師父好惡！一味話我返去冇practice，冇做思想訓練。


11號星期六
原本係想去剪髮的，不過得我一個人，訓醒起身就當然唔想出去啦！結果都係係屋企睇漫畫同埋卡通片。仲有食左媽咪買(其實係姨媽俾的)粽，紅豆粽好好味呀！甜甜地。不過果隻綠豆粽就‥‥‥因為唔同平時食開的傳統綠豆粽的，食落梗係唔知點咁。我都係鍾意返傳統果隻同埋紅豆呢隻。今次d粽好似係東海堂買的。

12號星期日
原本又係想早d出去APM剪髮/行街的，點知阿妹唔想出，留係屋企睇創世紀。加上聽聞張柏芝會係APM，一定係好多人，所以我都打消呢個念頭，係屋企睇漫畫同卡通。本應夠鐘出門口，可惜有人睇完一集又一集，催佢仲發脾氣話洗乜咁早！擺明就係冇聽老媽子講野啦！惡人先告狀！搞到我要打去搵阿媽同佢講，之後又話我篤佢背脊。知道自己唔arm仲要大聲夾惡，都唔知佢邊忽令人地覺得佢乖。

13號星期一
今日又係混混惡惡的過左。下午yvonne打黎話佢係中環附近，等埋我放工。佢一定係唔記得我而家係薄扶林做啦！知道左之後佢就話算啦。到放工我想起原來媽咪去左送姨媽機，屋企冇飯開，就搵返yvonne一起食飯。原本我想去試夏雪的，上幾個星期的雜誌有介紹。我搵到間野啦！d價錢都唔係貴呀！不過睇yvonne係人地門口睇左成個幾字都唔講話入去，就知佢唔係咁想啦。就轉去仙跡岩度食。傾左d計，知道佢的planning，我都好羨慕，我都好想呀！可惜人工就差咁多，前景又唔明朗，仲有master d錢未俾，仲有xx未俾。