考試

仲有7個工作天‥‥‥就到一月中啦！！今日supervisor問我點解早走，嘩！上堂ma，不嬲都早走嫁啦！放假放懵左佢咩~！好彩我有俾左個張上課紙俾admin，有晒evidence。

今日派左普通話考試果張form，會係3月尾至4月頭考，而家仲諗緊考對人果隻定係對電腦果隻，價錢唔同嫁。而且得返大約2個半月時間，都唔知溫唔溫得切。d同學有意思搵miss 做私人補習，不過‥‥‥我自己興趣就唔係好大。時間又唔係多，又係一group人傾，1個鐘4個人每人都講唔夠廿分鐘野就4舊水啦！而且我自己講得都唔係好差果d，今日miss都話我錯字唔多，係對文章唔夠熟所以停頓位唔arm、唔夠流暢。聽講考試流暢都係好重分嫁。

聽見果個同學仔，同我阿妹一樣大o既未來教師，完全係讀唔到，讀親都錯又成日走堂，都話報考試。我就覺得佢合格都好有問題啦，冇扣突分就算佢好彩啦！都仲咁勇又考呢個試又考老師果d普通話測試，真係登佢屋企人個荷包心痛。2個半月時間都唔會expect有太大的進步，佢個目標仲係同我一樣，係二級乙。我問過老師好多次，佢都唔話我夠班拎二乙呀！再加埋緊張令水準下降，三乙都得o既我諗我。幾次都忍住左口，好想同佢講‥‥‥面對現實好d，唔好咁急3月考，考8月或者11月，多d時間溫個機會都高d啦。

等我下星期考完急救，就全力溫普通話。我想今次考到二乙，之後再讀多次，再考個一甲/一乙返黎咁就very good啦。

呀！漏左一樣野。今日幫阿爸買糖水外賣等緊果時，有個男人行過黎企係我身邊仲好親密咁喎！我即刻行後一步，以為佢想我借過，仲即時望住佢個樣睇o下係咪真係識嫁啦。點知見佢對住我笑，心想，死啦！又係痴線o既。佢望左我幾秒就即刻say sorry。原來...佢認錯人啦，以為我係佢女友，果個女仔穿白色褸帶粗黑框眼鏡，我穿軍綠色大褸普通眼鏡，咁都可以認錯~